145
Dialuna 20 di augustus a tuma lugar un reunion historico na San Nicolas unda pa prome biaha
11 organisacionan a reuni pa uni forsa y lanta un plataforma comun “PLATAFORMA SAN
NICOLAS” cu ta bai traha na e interes di San Nicolas y pariba di brug. Un di e razonan inmediato
pa e reunion aki tabata e documento “National Transformation Map. San Nicolas City of
Innovation and Culture” cu San Nicolas Business Association a presenta riba 16 di mei na
prome minister di Aruba y despues na e comunidad. E National Transformation Map tabata e
resultado di combersacionan extenso cu a tuma lugar cu organisacionan y expertonan y asina
crea un mapa con pa transforma San Nicolas y Aruba pa asina nos por sobrebibi y prospera den
e era di globalisacion competitivo cu nos ta biba aden actualmente.
E initiativa di San Nicolas Business Association (SNBA) pa traha e mapa aki a trece un reaccion
positivo na San Nicolas y rond Aruba. SNBA a wordo aserka pa diferente organisacionan cu e
pregunta con nan ideanan y proposicionan tambe por wordo tuma en cuenta serka e gobierno
di Aruba.
E organisacionan di San Nicolas y pariba di brug ta bai uni y sera cabes pa conhuntamente
ejecuta riba nan mes actividadnan positivo pa nos ciudad y trece na oido di gobierno loke
Pueblo ta considera primario y importante pa nan comunidad, di e manera aki ta bai evita cu
manera den pasado ta bin cu initiativanan adhoc y fragmentisa cu na final di dia a crea
gastamento di hopi placa di caja di Aruba y no tabatin efecto duradero pa San Nicolas.
Durante e anochi ey tambe SNBA a amplia su directiva cu 5 miembro nobo y Mr. Rafael Estrada
y Mr. Mario Enrique Croes a tuma nan retiro for di e main board. Ambos miembro a wordo
nombra miembronan honorario y lo continua follow-up activamente den nos “team of consultants”.
