Amazonestraat, San Nicolas: Diadomingo algo prome cu 2’or di marduga, presencia di polis ta wordo pidi cu urgencia pa un homber cu tabata destruyendo un auto dilanti un cas den Amazonestraat.
Na yegada polis ta bin compronde cu ta trata di un problema di pareha cu a bay completamente for di man. Segun e dama, e homber a yega cas bou influencia y a cuminsa pleita cune, e homber den su furia a cuminsa kibra e bentananan di cas. Esey no tabata suficiente pa e baha su rabia y a dicidi di bay pafo y destrui tur e glasnan di un Nissan Cube cu tabata staciona dilanti di e cas. Ora ela caba ela bay for di e sitio.
Polis a sali busca rond y na un Cas den Coloradostraat nan a bin topa cu e homber aki.
E dama a entrega keho contra su pareha y na momento cu polis a topa cu e homber, mesora ela keda deteni, pero mirando cu e tabata herida cu varios corta serio na su man, Polis a hibe Imsan pa nan por trate.
Despues ela wordo transporta pa warda di polis na San Nicolas.
