128
E ta un necesidad pa e formacion di e generacion cu ta sigui bo.
ORANJESTAD – Diabierna den presencia di Famia di Faustina ‘Tan Tin’ Tromp, Minister Ruiz-Maduro, hunto cu colega Minister Lampe y homologo Minister Alcala Walle di Cultura na Corsow, Fundacion Mi Cutisa, Fundacion Monumentenfonds, Banco AIB y demas invitado a firma un ‘letter of intent’ pa asina logra conserva e cas na Pos Abou 19 como herencia cultural pa nos Pais.
E proyecto aki no ta un luho. Mas bien e ta un necesidad pa e formacion di e generacion cu ta sigui nos. Cas Tan Tin ta un di e poco casnan tradicional cu ainda tin su renbak, magazina, fogon, baño pafo y cura di transhi. Un tesoro cu tin su balor cultural, historico, cientifico, turistico y economico. Minister Ruiz-Maduro ta expresa palabra di gratitud na señora Faustina Tromp y famia pa nan scogencia pa no laga e herencia aki bay perdi na benta y transformacion di e cas den un obheto comercial.
Danki na Monumentenfonds cu ya pa mas di 1 aña y mey tabata buscando un manera pa por yega na un areglo pa e cas por keda conserva como herencia cultural. Na Banco AIB tambe un palabra di danki pa mustra interes como un bon cuidadano di nos Pais pa yuda inverti den conservacion di nos herencia cultural brindando e oportunidad pa un fianza na interes reduci pa por haci e proyecto financieramente posibel.
Na Fundacion Mi Cutisa un palabra di gratitud en especial pa e insistencia di mas di 5 aña pa por logra trece hunto Monumentenfonds, Banco AIB y Gobierno pa asina logra pa un proyecto den cual nos por salvaguardia nos herencia cultural por mira luz di dia na bienestar di e Pueblo di Aruba.
