Recientemente Minister Chris Romero y Minister Andin Bikker tabata na Corsou pa reuni cu nan coleganan di Gabinete Rhuggenaath, pa asina yega na palabracionnan concreto cu lo sostene e realisacion di e Proyecto Fast Ferry.
Den un reunion hopi ameno, Prome Minister di Corsou, sr. Eugene Rhuggenaath, Minister di Desaroyo Economico, sr. Steven Martina y Minister di Trafico, Transporte y Planificacion Urbano, sra. Zita Jesus-Leito a ricibi e titularnan di Aruba di e carteranan di Transporte, Comunicacion y Sector Primario, como tambe di Husticia, Seguridad y Integracion, den Fort Amsterdam na Corsou.
Fast Ferry ta un proyecto cu Gabinete Wever Croes y, particularmente Minister Chris Romero, semper a apoya firmemente for di nan trabou den Parlamento. Como tal, awor den su calidad di mandatario encarga cu e cartera di Transporte, Minister Chris Romero ta comprometi pa haci tur loke ta den su poder p’e Proyecto Fast Ferry bira un realidad.
For di luna di mei di e aña aki, Minister Romero a cuminsa e conversacionnan cu Gobierno di Corsou pa cu e proyecto di Fast Ferry. E prome reunion tabata entre Aruba su titular di e cartera di Transporte y Minister Zita Jesus-Leito, unda cu Minister Romero a expresa su interes di desaroya e Proyecto Fast Ferry entre Aruba y Corsou.
Despues di cu na luna di juni Ministerio di Transporte a reuni cu diferente stakeholders na Aruba, manera entre otro Inmigracion, Aduana, ATIA y SNBA, Minister Romero a tuma e iniciativa pa pacta reunionnan cu Gobierno di Corsou. Di e manera aki, hunto cu Minister Andin Bikker, a reuni na Corsou cu Premier Rhuggenaath, Ministernan Martina y Jesus-Leito, pa asina yega na e sosten politico cu e Proyecto Fast Ferry ta rekeri.
Dicho reunion a duna resultadonan sumamente positivo cu ta priminti di haci di e Fast Ferry e proyecto cu lo fortalese e lasonan comercial, economico y social entre Aruba y Corsou.
Durante e reunion entre Gabinete Rhuggenaath y Gabinete Wever-Croes, representa pa Ministernan Chris Romero y Andin Bikker, a acorda cu lo firma un MoU (Memorandum of Understanding) den poco tempo, unda cu ambos pais ta expresa e intencion pa desaroya e Proyecto Fast Ferry entre Aruba y Corsou. Dicho palabracion a keda ratifica den Conseho di Minister tanto di Gobierno di Aruba y Corsou.
E siguiente paso ta pa cada Gobierno instala un comision multidisciplinario pa atende cu e diferente trabounan di preparacion relaciona cu e Proyecto Fast Ferry. Den un futuro, y ora cu e proyecto yega na un fase mas avansa, lo instala tambe un comision mixto di Aruba y Corsou.
Ambos Gobierno ta convenci di e impacto economico positivo cu e Proyecto Fast Ferry lo tin pa Aruba y pa Corsou. Minister Chris Romero a keda sumamente satisfecho di mira e lasonan estrecho cu a keda fortaleci den e dos islanan ruman.
