A tuma nota di mensahenan cu Partido AVP y nan medianan comprometi a dicidi di cera un siman cu n’e treciendo un biaha mas confusion den nos comunidad sin necesidad bisando cu e minister encarga cu Finansas a dicidi di elimina bashi-uitkering di empleadonan publico. Den nan forma di comunica, nan a menciona tambe cu di e forma aki, Gobierno tin pensa di logra un maneho financiero responsabel.
Gabinete Wever Croes ta un Gobierno integro y transparente. Niun momento a dicidi di kita niun uitkering for di empleadonan publico. Esaki ta otro mentira mas di AVP y su medianan falso pa manipula un pueblo cu ya nan a masacra pa 8 aña largo.
Manera ya pueblo sa, Gabinete Wever-Croes a encontra crisis tras di crisis despues cu a asumi responsabilidad na november 2017. E situacion financiero tawata mucho mas malo cu a wordo premira. Loke ta mas tristo ta cu cifras uza pa gobierno anterior tabata fictisio. Esaki, banda di e crisis social, tawata un di e crisisnan mas grandi cu a encontra. Retonan grandi cu a uni tres partido mas ainda pa saca Aruba di e abismo financiero cu AVP a laga atras.
Mesora Gabinete Wever-Croes a cuminsa traha cuminsando pa realisa kico ta loke mester a haya mas prioridad. Paridonan MEP, POR y RED a drenta gobernacion cu un meta comun, esaki ta pa trece bienestar y prosperidad pa Aruba y hunto a cuminsa traha riba e retonan.
E crisis financiero cu e Gobierno di Mike Eman y AVP a laga atras, no a laga espacio pa promesanan di campaña wordo realisa manera mester. Sinembargo, e Gobierno di MEP, POR y RED ta trahando duro pa locual tin prioridad tuma luga pa asina pronto tur promesa worde realisa.
Laga nos no cay den mentira di “Fake News”. Esakinan solamente ta haci un pueblo daño. Y e unico motibo cu AVP y su medianan comprometi ta haci esaki ta pasobra nan kier bin bek na poder pa asina nan sigui cu e maneho iresponsabel cu nan a hiba cu finansas publico contal cu nan si a yena nan saco.
