Minister President Evelyn Wever-Croes a reuni cu Minister di Energia di Venezuela sr. Manuel Quevedo; Presidente y CEO di Citgo sr. Adrubal Chavez; y GM di Citgo Aruba sr. Luis Marquez tocante e refineria na Aruba. Minister President a yama e reunion aki pa haya mas informacion di e ehecutivonan di e refineria.
Prome Minister a expresa na inicio di e reunion cu e refineria no ta solamente un negoshi sino e ta un pilar economic di nos pais. Pa e motibo aki e informacion ta crucial. Citgo a reconfirma su compromiso pa inverti den e refineria. Nan a señala cu e sanccionnan di Merca te ainda a haci imposibel pa nan logra e financiamento di e rehabilitacion. Actualmente Citgo ta buscando un solucion pa cu esaki. A keda palabra cu dentro di un luna nan lo indica na Gobierno kico ta e solucion pa nan yega na e placa pa asina cumpli cu e inversion.
Citgo a confirma loke Directiva di Citgo di Aruba a indica anteriormente cu pa 1di september nan lo haci e fase dos. E inverion di 35 miyon dollar cu ta bay cuminsa otro siman diabierna lo dura 8 luna pa 10 luna. Esaki ta duna Citgo e tempo pa yega na e solucion con pa cuminsa cu e fase 3. Prome Minister a pidi Citgo Aruba tambe pa nan informa comunicad mas riba esaki.
Un tema hopi importante cu a wordo toca durante e reunion ta tocante e trahadornan di refineria. Gobierno e expresa cu lo kier pa nos hendenan local haya trabou prome. E punto aki tawata comprendibel pa e representantenan di Citgo y nan lo tene cuenta cu esaki.
“Minister di Energia Quevedo a confirma e compromiso di Venezuela den lasonan entre Aruba y Venezuela. E reunion a bay bon y apesar cu no a sali hopi informacion nobo, por lo menos awor e partidonan a sinta na mesa y a haci palabracion cu aki na un luna lo duna mas informacion”, Prome Minister Evelyn Wever-Croes a bisa.
