Parlamentario Endy Croes ta indigna cu cierto desaroyonan cual ta tranca vision di un gobierno pa por cumpli cu su metanan. Ta masha normal y husto cu na momento un gobierno nobo sinta e minister encuestion ta pone su hendenan di confiansa den “Board” di diferente compania estatal of organisacion cu nan structura ta di tal indole. Den Lotto pa Deporte esaki no ta diferente desde cu Lotto a wordo lanta. Desde aña 1982 a lanta Lotto pa Deporte cu e vision desde e tempo aya cu e placa cu e loteria genera lo bay bek den deporte y cultura. Tur gobierno desde e tempo aya ta pone nan bestuur y asina e minister di deporte por haya sosten pa sigui y cumpli cu e vision di e Minister di Deporte.
Lotto como rehen
Lamentablemente gobierno di AVP kendenan a manda Aruba bancarota no solamente a destrui nos finansas publico pero a cambia statuto di Lotto pa Deporte despues di 22 di september 2017 unda a logra “lock out” e Minister di deporte. Good Governance Code di tur compania respetabel rond mundo miembronan di “Board” por sinta maximo 2 termino di 4 aña y pues despues di 8 aña ta masha normal y saludabel pa por tin hendenan nobo cu ideanan fresco pa maneha den e caso aki Lotto pa Deporte. Sinembargo Mike Eman y Mike De Meza a permiti pa nan amigonan di cas cu nan a pone na poder esta den “Board” di Lotto atraca Lotto di tal manera y mantene Lotto como rehen. E amigonan di Mike Eman aki a gasta miyones di Lotto na conseho y a usa un profesor Frank Kunneman pa haci cambionan style di piratanan di antes na un manera di sinberguensa pa logra nan metanan.
Director ta paga su mes
Mas tristo ta cu Hues J. Sab a cay den e trampa aki y apesar di por mustra hasta malpractica cu bestuur actual a comete durante 8 aña a duna e directiva di Lotto e beneficio di duda pa keda sinta riba un stoel pa nan cab’i pluma e resto. Pues despues di 8 aña contra tur regla di deugdelijkheid van bestuur y propio good governance code di Lotto cu tur respet Hues J. Sab ta haya ta ok pa nan keda. Tin biaha mi ta pensa mesora riba Piet Hein. Parlamentario Endy Croes ta splica cu adhunto awe e ta los un (1) di e tantisimo documentonan cu tin como prueba con Director ta paga su mes. Kier puntra CBN esta Canada y pueblo di Aruba si esaki ta normal? Con Canadian Bank Note un compania mundialmente conoci cu ta traha Security Documents manera paspoort pa rond 80 pais rond mundo y ta print placa y atende cu asuntonan secreto di hopi pais por permiti su mes pa haci negoshi cu hendenan asina?
Amigonan di cas di AVP
Un director cu ta cobra su salario, banda di su compensacion ta haci trabao pa e mesun compania cobrando tur luna sumanan barbaro. Tur e miembronan di “Board” ta na altura. Silvio Milanio Janga (Amigo di cas di Mike de Meza), Benvinda Maria Sousa (Mike de Meza), Antonius Aymon Kamperveen (righthand di Mike Eman himself), Flavio Fernando Faneyte (chef na ELMAR NV y amigo di Benny), Elias Juan Filomeno “Eli” Kock (amigo di Mike Eman y ex-candidato di AVP), tur esakinan ta hunto cu Destefano Wernet y ta firma pa tur locual ta pasando den Lotto. Mira adhunto e lista. Corda ta e mesun mentalidad aki a redobla debe di Aruba di 41.7% GDP na 2008 pa 90% na 2018. Ta e mesun mentalidad aki tin Aruba awe pagando na interes 216 MIYON florin pa aña cu ta igual na 600 mil florin cada dia.
Parlamentario Endy Croes ta termina bisando cu moral, dignidad y consenshi ta balornan hopi importante den caracter di un ser humano cual por identifica bo como hende. Tanto “Board” di Lotto, Destefano Wernet pero tambe Canadian Bank Note (CBN) no tin esaki at all y ta laga un grupo di “mafiastars” perhudica deporte y henter un nacion. Un carta pronto lo sali pa gobierno Hulandes splicando e tema aki hopi amplio di e proceder di e “tag team” CBN /Board Lotto.
