ORANJESTAD – Ayera diahuebs, Parlamento di Aruba a trata e presupuesto 2018 di e Tourism Product Enhancement Fund (TPEF), caminda Minister Dangui Oduber a trece puntonan dilanti cu ta importante pa fortalece nos unico pilar economico. E Minister a gradici Parlamento pa aproba esaki, marcando un paso importante pa e desaroyo turistico di Aruba.
TPEF ta un fondo cu a wordo estableci na 2010 pa eleva e producto Aruba. Manera parlamentario Hendrik Tevreden a menciona durante reunion di Parlamento, “Minister a hiba un campaña fuerte pa engrandece nos Turismo pa asina hisa e nivel di Turismo y crea un Turismo di Calidad.”
E vision di Minister Dangui Oduber ta pa eleva e calidad di Turismo, eleva producto Aruba, pa eleva e nivel di servicio cu nos ta duna. Pa duna servicio di calidad bo tin cu busca loke e turista kier, y esaki sin duda ta e experiencia cu Aruba ta brinda. Pues den cuadro di e vision pa engrandece nos turismo a base di un maneho profesional y transparente, lo sigui lucha pa mantene y eleva e nivel di experiencia cu e turista ta bin busca den e producto Aruba.
E preguntanan cardinal cu ta ser haci pa forma e vision ta, ‘kico ta importante pa producto Aruba y pakico mester inverti den producto Aruba?’
Aruba ta e di dos pais na mundo cu ta depende completamente di Turismo como entrada principal. 82% di nos GDP (fuente di entrada) ta bin di Turismo.
E inversionnan mas grandi pa e fondo aki ta encera e ‘Malmok Boardwalk’, cual ta cuminsa na Ritz Carlton y ta termina na e crusada di Malmok. Tambe lo inverti pa drecha e palonan di luz riba caminda pa yega California Lighthouse, unda cu actualmente tin 27 palo fuera di funcion, lagando e caminda sin iluminacion. California Lighthouse ta un di Aruba su atraccion turistico mas bishita, cual ta haci e inversion aki importante, ya cu gobierno ta trahando pa eleva e siguridad pa nos bishitantenan, como tambe nos hendenan local.
Na banda di e inversionnan cu lo wordo haci pa medio di TPEF, e fondo lo ta aportando na otro aspectonan di e area, trahando cu diferente stakeholder. E aspectonan ta encera preservacion di e medio ambiente y herencia cultural. Programanan di conscientisacion, manera entre otro ‘Stima mi, Sterilisa mi’ lo haya nan debido sosten. Tambe lo ta trahando riba embeyecemento di areanan turistico, door di percura pa e mantencion debido di e infrastructura y paisahe.
Minister Dangui Oduber tin e pleno confiansa cu e fondo di TPEF lo sirbi pa engrandece nos producto Aruba y ta ‘sumamente satisfecho cu e logro importante aki’.