Pos Abou – Diahuebs atardi pa mas o menos 3:30 p.m polis a bay un adres na Pos Abou, caminda lo tawata tin varios persona bringa segun informacion.
Na yegada di polis na e adres, nan no ta topa ningun hende. Polisnan a bay parti patras di e cas, caminda nan ta haya un Chevrolet Aveo color oraño.
Agentenan a mira cu tawata tin luz parti patras di e auto kibra, probablemente door di destruccion.
Rond di e auto tawata tin rastronan di sanger. Polis a bati na porta di e cas varios biaha prome cu esaki a habri.
E homber D a habri e porta di cushina. E momento ey polisnan a mira sanger na muraya y ariba vloer den cushina.
D a conta polis cu elo a wordo maltrata door di 2 homber, un e conoce cu ta RC cu ta biba na Bushiri.
RC ta un bon conoci di husticia y door di e polisnan, como sospecho den varios caso di ladronicia, atraco y maltrato.
D a bisa polis cu e otro homber e no conoce.
Segun D, e tawata drumi den camber ora e dos hombernan aki a drenta y mesora cuminsa maltrate.
Segun D, RC a dale cu un bate di aluminium y e otro homber cu mokete.
Ambos homber a dale varios biaha den su cara y tambe ariba su cabes.
Agentenan a constata cu D a wordo seriamente maltrata, door di heridanan cu e tawata tin tanto na cara y golpinan ariba su cabes.
Asina mes D no tawata kier ningun sorto di asistencia medico.
Mirando e gravedad di e heridanan, agentenan toch a pidi pa un ambulance pa controla e homber. Na yegada di ambulance, D a nenga asistencia di paramediconan. Personal di ambulance a trata varios manera pa convence pa e bay cu nan hospital, mirando e seriedad di e maltrato.
Muy probablemente e tin interne bloeding.
D a keda para ariba cu e no ta bay.
Recherche y slachtofferhulp tambe a wordo poni na altura di e caso serio aki.
D a parafeer un nota cu ela nenga asistencia di parti ambulance dienst.
E homber a bisa polis tambe cu e no ta desea di entrega keho contra e dos hombernan, y cu mas laat e mes lo bay hospital.
Momento cu polisnan tawata bayendo di e sitio, a yega un muhe cu no kier a duna polisnan su nomber.
E muhe aki a cuminsa grita D y a bise, esaki ta consecuencia di stalking.
A resulta cu dicho adres na Pos Abou, ta di mayornan di e muhe.
E muhe tawata kier pa e homber D yega eynan mas.
Ora a puntra D, a resulta cu e muhe ta ex casa di dje. D a declara cu nan tin dos luna cu nan a separa.
Segun e muhe, cu D ta bin eynan cu ta cas di su mayornan pa stalk e y ta forsa e bentanan of porta pa e por drenta.
Aki e muhe tampoco kier a haci denuncia.
Polis a bisa D cu e mester bandona e sitio.
