ORANJESTAD – Despues di un periodo largo sin cifra anual di Cuerpo Policial y Ministerio Publico na disposicion, pa por tin un bon analisis di e departamento hudicial di pais Aruba, porfin cu ayudo di Minister di husticia, mr. Andin Bikker, e cifranan pa 2016 ta conoci. Parlamentario Sue-Ann Ras (MEP) tabata un di esnan cu a boga pa e informacion aki for di tempo cu el a drenta Parlamento, pa por wak con pa ataca y soluciona e aspecto problematico di nos hobennan. “E ta un comienso y mi ta contento pa esaki,” Ras a bisa tocante e esfuerzo di e mandatario di husticia e siman aki, cu e siman aki a entrega un copia di esaki na e parlamentario concerni.
VISION
Segun e parlamentario, sin e informacion ricibi, tabata dificil pa bin cu vision y mehoracion den plan di accion y ehecucion pa nos hobennan. Esaki ta conta specialmente pa loke ta trata nos problemanan di husticia cerca e grupo aki y con lo por ataca y soluciona cada aspecto problematico.
IMPORTANTE
E relatonan di Cuerpo Policial como tambe di Ministerio Publico tabata di sumo importancia pa Parlamento y pa tur instancia concerni por tin. “Esaki debi cu e diagnostico di y bou di e hobennan, cu ta comete un delito, sigur a aumenta, pero sin e relatonan aki, ta dificil pa bo sa, di ki tipo di delito nos ta referi na dje y tambe cua grupo di edad, como districto ta mas halto bou di nos hobennan”, Ras a bisa. Manera e frase importante di e legendario Nelson Mandela: “No por tin un revelacion mas intenso di e alma di un sociedad, cu e forma con ta trata su muchanan.”
A base di e relatonan aki, autoridad y publico interesa ta haya na su disposicion, e datonan principal, e problemanan y alabes un reflexion di nos futuro generacion. “Nos tin cu brinda miho oportunidad di transformacion, rehabilitacion y reconstruccion di e caminda pa nos hobennan, cu a cay den problema hudicial, pa evita cu e circulo di hoben recidivista sigui crece,” Ras a sigui bisa. “Nos mester por identifica un serie di carencia y punto importante pa por resolve, desde e evaluacion di e accion- y programanan, cu e institucionnan en cuestion ta brinda, cu finalidad di duna alternativa pa nan reincorporacion den nos sociedad como hende responsabel y respetuoso na e leynan”. E strategianan di intervencion mester ta dirigi na construi un politica di reintegracion social humano, p’e hobennan por desaroya nan maximo potencial- y capacidadnan di manera positivo pa su famia y nos sociedad.
Ras ta consciente cu ainda falta hopi pa haci. “Sinembargo, esaki ta un paso esencial y crucial, cu sigur lo por traha riba e resultado- y recomendacionnan corecto di maneho y vision den e area hudicial,” Ras a finalisa bisando.
