60
Dia 4 di Juli Jourdé Klabér y Záhyon Klabér a sali rumbo pa Hulanda y nan a wordo guia pa ex campeon mundial, coach olimpico Henk Meijer. Henk Meijer no ta desconoci aki na Aruba, pasobra e tin amor grandi pa Taekwondo. Henk Meijer a prepara training stage na Spaña, Belgica, Hulanda, Alemania y un campeonato na London pa e rumannan Klabér. Den nan tempo liber nan a logra bisihita Austria tambe.
Alberto Klabér trainer y coach di Brazil Taekwondo Stichting tin un amistad estrecho y largo cu Henk Meijer kende sa guia e team rond mundo na campeonatonan y camp training. E aña aki a tuma contacto cu Henk Meijer tocante preparacion pa e categoria adulto pa e dos atletanan aki y Henk Meijer a logra pa nan participa na 4 training stage y un campeonato na London.
Jourdé Klabér y Záhyon Klabér a yega Aruba bek dia 15 di Augustus y nan a wordo ricibi pa Prensa, Presidente di Aruba Taekwondo Bond Dr. Guaicaipuro Jimenez y Director di Lotto pa Deporte sr. Di-Estefano Wernet. Dr. Guaicaipuro Jimenez tabata contento cu e regreso di e atletanan cu awo lo sigui cu nan preparacion pa Costa Rica Open cu ta nan prome G1 den e categoria di adulto.
Sr. Di-Estefano Wernet a hiba palabra di satisfaccion y Lotto pa Deporte ta kere den desaroyo di atletanan di deporte. Lotto pa Deporte ta contribui na bienestar y progreso di atletanan cu ta destaca nacional y internacional. Sr. Di- Estefano Wernet a felicita ambos atleta pa nan logro na London, Inglatera unda cu nan a logra gana medaya di Oro. Brazil Taekwondo Stichting su atletanan tambe a bay aeropuerto pa ricibi Jourdé Klabér y Záhyon Klabér.