Minister Glenbert Croes na mas di un ocasion a declara di ta un mandatario cu lo traha na bienestar di tur e trahadornan responsabel cu ta cumpli cu nan debernan laboral.
Cu esaki como su punto di salida, Minister Glenbert Croes a expresa di tin varios cambio y mehoracion laboral cu e lo kier ehecuta manera entre otro aumento di salario minimo, mehoracion di e aspecto di salud na trabou, introduci e ley di ARBO. Pero den mesun rosea Minister a declara tambe di kier logra tur esaki unda cu tur gremio/stakeholder por carg’e y ehecut’e. E idea no ta pa duna un man aki banda y corta un pia afo aya banda. Esey sigur no ta e mandatario su manera di kier logra metanan grandi riba tereno laboral.
Pa e motibo aki cu e mandatario den luna di Juni a anuncia di lo kier institui e Dialogo Tripartite Laboral entre Gremio – Sindicato y Gobierno pa den dialogo yega na un proposicion cu ta carga aprobacion di tur. Den cuadro di esaki riba 16 di augustus e prome reunion a tuma lugar unda tabata presente Sr. Hubert Dirksz di FTA y Sr. Diego de Cuba di STA, Sr. Leo Jarzagaray, Sra. Flor Petronilia y Sr. Omar Tromp y Sr. Enrique de Cuba ambos representando Gremionan.
“Awe nos ta cuminsa un caminda puro, genuino y sincero pa nos defini hunto un caminda pa un miho futuro pa un y tur”, e mandatario a expresa.