“Dicon 8 aña largo bo no a pidi ningun documento manera di Tereno, Tera Group y Paxi, Sjiem Fat pa nombra algun?”
Parlamentario Endy Croes a baha pisa riba Marlon Sneek den conferencia di prensa di Fraccion di MEP. Endy Croes a bini cu un map carga cu docunto y a splica cu ta Fraccion di MEP a manda pidi Minister e documentonan aki y Minister cu tur transparencia a manda tur pa Parlamento y manera Marlon Sneek a ricibi esakinan sin studianan a pega e blunder historico. Marlon a grita manera un “alma malo” contract di 39000 pa luna x 6 ta 2.4 MIYON florin. Enbes di pidi un disculpa como cu tur ser humano por comete un eror el a bay Canal 90 cu Speed pa splica cu ta un aas el a tira pa Minister. Endy Croes a laga prensa scucha e vos di Marlon unda e ta grita na un manera sarcastico “claro cu mester bay cobra pueblo pa sushi” pasobra ta 2.4 MIYON na contract bes 2 ta 5 MIYON. Un barbaridad total di un Parlamentario amateur.
Ladronicia di terenonan
Parlamentario Endy Croes a splica puntrando Marlon Sneek dicon den 8 aña bo no a haci bo trabao di controla y awe bo kier pretende cu ta bo trabao bo ta haciendo. Parlamentario Croes a saca documento pa documento – un pa un – puntrando Marlon dicon e no a controla y pidi documentonan di tereno manera Deshaun NV unda Leoncita a haya 5000 m2 na tereno y a bende esaki? Dicon e no a puntra pa documento di M.A. Arends kende a haña 42096 m2 den Colony den 1 dia y a bende esaki? Dicon e no a controla yiu di Leoncita R.R.R. di 19 aña kende a haya rond di 5000 m2 riba mesun dia cu el a pidie pa luxe appartementen na Eagle y a bende esaki? Unda Marlon tabata ta? Damira Real Estate cu a bende tereno na Eagle pa 3.5 MIYON Dollar? Dicon e no a pidi documento di e compania di su colega Richard Arends esta Horizon Consultancy cu a strica mas di 1 miyon florin?
Mas y mas bagamunderia
Dicon e no a pidi documentonan di Sjiem Fat kende a cobra 5.3 MIYON na advies? Rita Oosterwijk amigo di De Meza y a traha den su kantoor alaves a cobra na banda 1.2 MIYON pa advies? Hills Stern amigo di Mike Eman 2.4 MIYON na advies? Destefano Wernet Directeur di Lotto a paga su mes den un solo aña 208 mil florin pa accountancy, unda Marlon tabata ta? Social Pop Sebastian Saldarriaga 27 Mil pa luna pa cana cu Mike y saca potret, que hubo Marlon? Oscar Fernandez La Mania Events 45000 florin firma pa Mike himself 3 di Februari 2017, unda bo tabata Marlon? Tera Group y Paxi di Patrick Paskel pa nombra un par di pagonan efectua na dicho compania: 16 mil, 62 mil, 125 mil, 40 mil, 10 mil, 63 mil, 42 mil, 25 mil, 84 mil, 33 mil florin. Esaki ta e secuencia di normalidad cu dicho compania tabata cobra y Marlon Sneek roncando. Unda bo a keda pa controla? Desaster ta poco pa locual AVP a causa y a laga atras. Pues si lider di Fraccion di AVP kier ta honesto, splica pueblo kico exactamente bo a haci 8 aña largo. Parlamentario Croes a mustra den prensa tur e documentonan, un pa un. Tin hopi mas esaki ta solamente e inicio, Croes ta termina bisando.