Aruparking ta un di e companianan gubernamental cu for di su institucion a crea hopi polemica den nos comunidad. Nos por corda con tabatin hasta protestanan pidiendo pa elimina e compania cu ta percura pa regulacion di parkeo den centro di ciudad. Pero tambe a mira un cantidad di ciudadano cu tabata pidi pa bin cu un solucion di parkeo den Oranjestad, como cu e ta sumamente dificil pa por para bo auto den cercania ora di bay haci cualkier diligencia.
E no ta un secreto cu e situacion di Aruparking ta uno precario y esaki ta un di e tanto problemanan cu e Gobierno actual a hereda for di e Gabinete anterior. Pa falta di un maneho responsabel y vision realistico di sr. Mike Eman na momento cu el a dicidi abruptamente pa kita e funcionabilidad di Aruparking, awendia e compania estatal aki ta den un abismo financiero.
Gabinete Wever-Croes ta comprometi pa busca un solucion viabel pa e situacion penoso cu Aruparking ta pasando aden actualmente, y como tal Minister Chris Romero a institui un grupo di trabou cu ta trahando hopi di cerca cu comerciantenan den Caya Principal. E intencion ta pa realisa un estudio profundo di e factibilidad y funcionabilidad di Aruparking den centro di Oranjestad.
Mester considera e deseo di nos ciudadania, pero poniendo atencion special na loke esunnan directamente afecta ta pensa di Aruparking. Tampoco por lubida cu Pais Aruba a inverti un capital financiero grandi pa haci Aruparking bira un realidad. Pero tambe mester tene na cuenta cu Aruparking ta representa e sustento financiero di hopi famia. Si e compania cera lo nifica cu lo tin un grupo di persona sin trabou, cual lo pone famianan den un situacion precario tambe, cual tampoco lo resulta beneficioso pa e economia fragil cu nos pais ta aden actualmente.
Un grupo di comerciante cu tin negoshi den centro di Oranjestad ta di acuerdo cu mester bin un regulacion di parkeo den Playa, pero esaki mester wordo implementa responsabelmente y teniendo na cuenta cu e comodidad di nos turistanan y localnan ora di haci nan diligencianan den Centro di Oranjestad. Tur esakinan ta aspectonan cu ta den consideracion aworaki pa asina restructura Aruparking y haci’e funcional bek pero na beneficio di nos pais.
Den luna di september Minister Romero ta spera di por tin un bista amplio di cua lo ta e maneho apto pa hiba den Aruparking y duna e compania un restructuracion cu ta di vital importancia pa su existencia.