Home » Axel y su Pork’i Spaar a Impacta

Axel y su Pork’i Spaar a Impacta

by Admin
0 comment 74 views

 

Kiwanis Club of Young Professionals Aruba (KYPA) ta considera importante pa nos tin un comunidad fuerte y capaz. Pa e motibo aki KYPA ta pone atencion na concientisa y educa nos muchanan riba e topico di finansa personal. Durante e temporada di vacacion escolar 2018, KYPA a bin ta ehecuta e proyecto Placa Chikito. E aña aki a crea un buki y haci uzo di storia pa asina aki concientisa y educa nos muchanan. E buki titula ‘Axel y su Pork’i Spaar’ ta enfoca riba genera, spaar, y tambe duna placa bek. Banda di esaki e buki ta siña e muchanan tambe e diferencia entre kico nos kier y kico tin mester, y asina aki defini un meta pa cual bo ta spaar p’e.

 

KYPA a organisa cuatro Atardi di Storia den diferente bario pa asina presenta e buki ‘Axel y su Pork’i Spaar’ na nos muchanan. E Atardinan di Storia a wordo organisa conhuntamente cu Fundacion Bon Nochi Drumi Dushi, caminda cu nan boluntarionan a presenta e mensahe cu Pork’i Spaar tin pa tur e muchanan di Aruba. Alrededor di 170 mucha a participa na e diferente Atardinan di Storia caminda cu e boluntarionan di KYPA a guia e atardinan. Tur mucha cu a participa a ricibi un buki di ‘Axel y su Pork’i Spaar’ y tambe un spaarpot regalo. Mensahenan ricibi for di varios mayor ta ilustra e fruto di e proyecto mirando con muchanan a tuma consehonan den e buki y actua riba nan.

 

Un palarbra di gradicimento na Edselyn Figaroa cu a scirbi e storia y Leidys Ledesma cu a haci e ilustracion. Danki tambe ta bay na Aruba Bank y Caribbean Mercantile Bank pa nan aporte y contribucion. Elite Productions & Entertainment pa nan asistencia y contribucion pa e parti di audio visual durante e atardinan y sin laga afo Fundacion Bon Nochi Drumi Dushi cu tabata un partner importante pa e proyecto aki. Kiwanis Club of Young Professionals Aruba ta contento di por contribui na crea un mihor mundo, un mucha, un comunidad cada bes. Un total di mas di 430 ora di trabou boluntario y un balor di AWG 18.000,- a wordo inverti pa haci e proyecto aki un realidad.

 

Pa e mayornan cu ta interesa den un buki pa nan yiu(nan), por tuma contacto cu KYPA via nan Facebook Page pa un contribucion di AWG. 25,- pa buki e muchanan lo haya un spaarpot regalo. E buki tambe lo ta pronto obtenibel na DeWit & Van Dorp. KYPA y su partners ta contento di por aporta y duna bek na comunidad durante e temporada di vacacion escolar por medio di e proyecto aki y ta desea tur mucha un aña escolar nobo cu hopi exito.

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio