Minister Dangui Oduber ta lamenta profundamente con websitenan local ta hunga cu nos unico pilar economico y ta crea panico inecesario relaciona cu e noticia di zika. Ta parce cu cueste loke cueste kier kibra nos economia.
Minister Oduber a keda completamente asombra diasabra atardi despues cu nan a tuma nota di informacionnan incorecto cu Center for Disease Control CDC recientemente a publica riba su website.
Lista CDC
Desde e outbreak di ZIKA na fin di anja 2016 CDC a traha un lista di tur e paisnan na mundo unda Zika ta circula. Tur pais/isla cu tabatin Zika a wordo poni ariba e lista aki pa seguridad di hende muhernan na estado.
Zika a bira endemico na tur e paisnan aki, esaki kiermen cu zika ta keda circula una bes introduci na e pais. Kiko e paisnan aki mester aplica ta prevencion. Dus duna tur e informacionnan necesario na e biahero (den e caso) encuato e situacion di Zika. Pero tambe duna e informacion aki encuanto casonan di zika na e organisacionnan.
Na 2016 y te na mitar di 2017 DVG a keda manda informacion na ATA encuanto e situacion di Zika pa asina informa e turistanan encuanto esaki. E informacion aki ta importante pa e keda activo, asina e biahero por wak cu tin accion ta wordo tuma pa evita cu e biahero por wordo infecta cu e virus. Tambe ta exisiti un programa cu e hotelnan pa nan ta liber di criadero.
Locual Aruba por hasi ta keda transparente cu e informacion encuanto zika. Akinan ta na unda International Health Regulatios (IHR) ta un tool hopi importante pa usa. IHR ta exigi si tur pais pa na ta transparente den nan informacion encuanto Zika. Si keda transparente lo no stroba e trafico di hende of comercio.
Enberdad e noticia aki no ta nobo, pero tampoco e ta di alerta pasobra Aruba no ta den ningun situacion di epidemia of alerta pa cu Zika. E ta un noticia bieuw.
Mester remarca cu CDC ta publica e mesun informacion pa varios otro isla den Caribe incluyendo Barbados, Boneiro, Corsou, Nevis, Saint Lucia y US Virgin Islands (USVI).
A.T.A. lo continua cu esfuersonan pa comunica desaroyonan debidamente na bishitantenan como tambe socionan den turismo. Ademas, ta bon pa remarca cu no obstante e outbreak na 2016 y djey continuacion di e fenomeno aki, den sector di turismo e impacto a ser mitiga y turismo di Merca –mirando cu ta papiando aki di CDC cu ta un organo Mericano- a crece cu 10.6% na 2017 y ta creciendo cu 7.4% te cu awo. Tambe mester remarca cu publicamente CDC no a publica nada referente e noticia cu a sali diasabra ultimo localmente.
A.T.A. ta sigui monitorea e situacion di serca y lo sigui ta den contacto estrecho cu Ministerio di Salubridad y e departamentonan concerni.
Departamento di Salud Publico Aruba tin ci informa communidad cu actualmente na Aruba nos no ta experenciando ningun brote di Zika tampoco Dengue ni Chikungunya. E informacion publica pa CDC unda ta duna e impresion aki no ta cuadra cu realidad.
Actualmente Ministerio di Salubridad Publico ta den conversacion cu e expertonan di e programma World Musquito Program pa bini cu mihor formanan pa preveni e tipo di criaderonan aki.