Hopi ta papia awe di e situacion social dramatico na Venezuela sin pensa cu no ta e politiconan so a crea e situacion, pero tambe e grupo di 17 comerciantenan poderoso cu tabata doño di practicamente tur negoshi, tereno y cu prensa cumpra tabata controla tur cos, unda nan tabata yuda manipula pa pone gobierno haci locual practicamente nan tabata kier! A corumpi practicamente henter un sistema politico y economico. Institutonan tur a ser derumba. Al final despues cu un grupo di militar bao di guia di Chavez kier a coy poder via golpi di estado y cu a cera Chavez y como cu a core e tempo ey cu Carlos Andres Perez, a bin un gobierno chiripero di 19 partido politico bao guia di e Cristian Democrata Caldera cu a duna Hugo Chavez pa colmo amnestia y sakele for di prison. Chavez no tabata tin ni partido politico, pero a lanta un movimiento y a landslide gana tur eleccion y a keda 17 aña na poder, pasobra pueblo a fada di corupcion y e mesun pueblo a crea un otro monster cu a caba cu Venezuela y cu awe no tin salida mas y a bira peor cu Cuba.
Na Aruba e situacion politico ta bayendo mescos. Desde cu mi a bira lider di MEP mi a pone pa mi mes como meta cu ta bay trata na crea un comunidad husto y cu e poder economico mester ser reparti mas tanto posibel. No pone tur e webonan den un solo macuto! Mi a haya 4 oportunidad pa yega sin ningun compromiso cu ningun poder economico pa gana eleccion y goberna e pais aki.
E prome cos cu mi a percura pa tin un balansa den e podernan y a percura pa para desmantelacion di e refineria y a logra su reapertura. E di dos tabata schrap e fecha di Independencia di 1996 for di den Statuut pa trece atrobe claridad, trankilidad y siguridad pa nos futuro, pero manteniendo si e derecho pa por bira independiente na un manera ordena y responsabel dia cu e pueblo den su mayoria kier esaki.
E plan cu nos gobierno a traha pa crea 100 ha di tereno di waf te Malmok, esta Plan Sasaki a ser continua. Cu e plan aki, ora e refineria a cera tabatin suficiente infrastructura pa construi facilidadnan turistico, danki na Nel Oduber y su gobierno, su vision cu a inicia na 1983. Mescos cu ta e caso ora a construi na 1982/1983 e Containerhaven.
E waf di Aruba un compania priva tabata su doño y nos a bay hues varios vez pa kita esaki y a ser bringa pa Astec, UPA, FTA, Camara di Comercio, ATIA y hasta AHATA. Tur tabata obstaculisa e mehoracion den waf. AVP cu prensa comprometi tur dia tabata yuda bringa e proyecto cu nos tabata tin pa hunto cu un grupo di Spaña, Brasil, India y China pa muda e waf industrial pa Barcadera y construi un haf pa container moderno na Barcadera, un jachthaven na Oranjestad y un hotel di 5 strea Grand Melia. Mi a bay China 2 vez, India y Brasil. Tabata tin un proyecto aden pa embeyece e haf turistico te Caya Betico Croes cu un walkway etc. Mas cu 500 miyon dollar total na inversion.
Pakico a boicotia y stroba e proyecto aki? Cu por a trece un balansa den e poder economico. Partido AVP pa defende sponsor a start un campaña cu lo tin corupcion, cu haf lo bay bira caro, a difama y fulmina contra e proyecto pa defende Astec, a manda hunto cu ATIA cartanan pa esnan na Spaña cu tabata interesa den e proyecto, a ‘logra’ cu UPA pa welga y hunto cu e prensa comprometi tabata fulmina, instiga tur dia y inventa un storia di un tal Namdar cu ami no conoce mes, cu no tabata at all den e proyecto y a stroba ehecucion di e proyecto bunita aki pa nos pueblo y pa e desaroyo economico pa nos isla creando un balansa den e podernan economico.
Tambe e director pa region di Caribe di Royal Caribbean a bin cu un bunita proyecto pa embeyece, inverti den nos haf na Playa, pero tambe a bay otro isla. Esaki ora nan nomber na un forma inhusto a ser lastra den cosnan cu no tabata berdad.
Awe e proyecto cu e Chinesnan tabata tin hunto cu nos a bay Jamaica y Gobierno Chines a inverti 2 biyon dollar na Jamaica. Un proyecto cu mi tabata tin tur contacto pa trece Aruba, pero e poder economico a malusa AVP, varios gremio y prensa comprometi pa core cu e proyecto y core cu MEP for di gobierno tambe. Nan a logra defende interes aheno economico.
No obstante cu mi so a haya mas di 6400 voto den e eleccion 2009, mi a retira cu tur honor y cara na laira, despues di a sirbi e pais aki 36 aña como politico, 3 periodo como diputado y 4 vez como boso Ministro Presidente. Mirando e resultadonan di eleccionnan na 2009, 2013, 2017 mi ta yega na e conclusion cu nos ta bayendo politicamente mescos cu Venezuela, unda e pueblo votador mes kier pa e isla aki bay y ta yama radio, critica pero hopi a vota pa AVP. A duna AVP 12 y 13 asiento pa caba cu Aruba financieramente, pone nos pais bao curatela Hulandes pa hopi aña mas cu un aumento di nos debe nacional di mas cu 100% den apenas 8 aña di mal gobernacion. A cumpra varios prensa pa yuda nan gaña, manipula, bruha pueblo pa por a sigui horta nos pais y destrui nos moralidad cu cos malo tambe ta bon. Companianan di publicidad a cobra 89 miyon florin y a paga na supuesto deskundig advies 112 miyon florin.
Ora mi a kere na 2017 cu tur esakinan cu pueblo ta duna nos partido MEP un mandato claro, ata nos den un coalicion di 3 partido, unda 2 cu 1 ta mas cu 9, ora nan kier usa nan poder.
Pa saca Aruba for di e crisis mester tin curashi, determinacion y no keda yuda concentra poder economico cu mescos un tempo na Venezuela ta usa nan placa pa yuda determina ken ta ser tolera den gobierno y con ta core cu e gobierno tambe. Strategia tur dia traha pa AVP ta pa destabilisa, instiga y manipula, unda nan plan diabolico ta pa mancha tur proyecto pa crea duda.
Mi observacion di 36 aña di experencia den varios gobierno y 4 periodo den oposicion tambe, cu nos no ta bayendo bon cu concentracion di poder economico, unda un par di hende so ta doño di tur cos.
Ki bal bo tin gobierno, pero no tin e poder di por dicidi manera abo kier pa bo pais. Kico bo haci cu no ta sirbi nan interes, boycott ta ser poni den funcion. E berdad y e realidad di nos situacion manera ami ta mir’e.
Nelson O. Oduber
Augustus 2018