Home Politics Parlamentario Michael Lampe Di desaroyo y progreso pa pakete di medida y...

Parlamentario Michael Lampe Di desaroyo y progreso pa pakete di medida y decepcion cu disgusto

“E decepcion ta grandi den comunidad y por sinti cu ta reina un disgusto grandi den pueblo pa bida di tur hende cu a tuma un rumbo menos positivo desde cu gabinete Wever Croes a introduci un pakete di medida sin piedad contra di pueblo.

Tur caminda, den tur sector por scucha con pueblo ta sclamando pa maneho di un gobierno cu no tin maneho pa sirbi interes di pueblo pero si tin interes pa cumpli cu famia y amigonan, sostenedo y sponsor di  partidonan den gobierno.

E disgusto ta sigui crece pa un gobierno cu a priminti asina hopi cosnan positivo ora cu nan a drenta gobierno, awor ta creando caos y disgusto grandi pa motibo cu practicamente riba tur tereno, placa di pueblo ta birando menos.

Fuera di e pakete di medida gobierno tambe a anuncia solucion pa problemanan social, a mal uza un caso lamentabel di dos criatura pa sirbi nan interes politico pero awor cu nan ta den gobierno, cu nan ta minister, ainda pueblo ta sperando kico ta bay wordo haci riba tereno social.

A pone un suma di 17 miyon riba presupuesto 2018 pa atende cu problemanan social pero fuera di e emplea cantidad di hende den e sector aki, pueblo mes no ta mirando cu algo ta wordo haci y solamente por scucha gritonan emocional di e gobernantenan cu mester alivia e problemanan aki.

A priminti solucion, a sigura pueblo cu lo atende cu e asuntonan aki pero pueblo  ta mirando cu esaki no ta tumando luga,  caminda pa cuminsa durante di ocho aña, for di tempo cu AVP a drenta den gobierno.

AVP a bin haya un caos financiero, un caos social y educacional na 2009  for di gobierno di MEP, gabinete Nelson Oduber,  cu a laga un debe mescos cu tur otro gobierno anterior cune, pero for di prome momento Evelyne y MEP a cuminsa cu tin un mega debe y e forma cu MEP kier soluciona esaki, y cual nan tabatin ocho aña gritando den tur skina, ta cu nan lo soluciona esaki sin cu mester tuma medida, no por mira algo positivo ainda.

Un gobierno cu tin casi 10 luna den gobernacion, ainda ta buscando solucion pa cosnan cu nan a bisa cu nan tin solucion pero ta mas cu claro cu e incapacidad pa atende seriamente cu interes di nos pais, di nos pueblo, simplemente no ta existi.

Na vispera di presupuesto 2019 por ripara cu net nada a ser logra den e prome 10 luna di gobernacion y solamente a crea un situacion delicado pa henter comunidad, pa economia di e pais y riba practicamente tur otro tereno.

Ocho aña largo e vision di MEP den oposicion tabata di atende cu e mega debe sin medida y den tur debate politico prome cu eleccion cu a tuma luga, por a scucha Evelyne Wever Croes bisa specificamente con e ta bay soluciona esaki.

Sinembargo kico pueblo ta mira ta pasando, ta cu e mesun politiconan cu a cana preocupa den Caya Betico Croes, preocupa pa e negoshinan, practicamente tur a biaha den e vacacion escolar cu tin pa exterior pa haci nan compranan, lagando centro di ciudad bandona y sin bira activo cu e comerciantenan pa busca un solucion pa loke ta pasando.

No ta cooperando  pa promove venta pa muchanan bay scol bek y pueblo ta keda na merced di su mes, caminda awor cu gabinete Wever Croes a ranca placa for di su cartera, no ta brindando ningun sosten adicional pa yuda esunnan di menos entrada, pa atende cu costo di educacion di nan yiunan.

Sinembargo tur caminda por mira hendenan ta wordo nombra, pa colmo hendenan cu tin un pasado caba cu e partido di MEP y como gobernante di MEP, kendenan ta gosando di un entrada di pensioen lucrativo pero awor ta haya un extra entrada den cualkier hunta di directiva di companianan di gobierno.

Pueblo tin cu soluciona su propio problema di menos placa, placa cu nan tin cu duna gobierno dor di otro pakete di medida cu gobierno di MEP a impone riba pueblo, na luga di bin cu solucionnan cu nan a priminti.

Sinembargo ta manera cu Minister di enseñansa a declara e siman aki, cos ta malo y lo bay bira mucho mas malo den tempo nos dilanti ya cu  su gobierno tin atencion pa su hendenan, pa su sponsornan pero no pa pueblo,” e comunicado di fraccion di AVP ta mustra.