Home » UPP: KICO LO BAY PREVALECE DEN E LUNANAN VENIDERO: INTIMIDACION OF BON GOBERNACION?

UPP: KICO LO BAY PREVALECE DEN E LUNANAN VENIDERO: INTIMIDACION OF BON GOBERNACION?

by Admin
0 comment 47 views
Nos ta den un momento cu historia lo posiblemente lo bai categorisa como trancendental pa nos pais, pa nos democracia y tambe pa nos identidad politico. Den luna di augustus lo bay tuma lugar dos evenemento importante.
Na prome lugar lo bay tin un debate den parlamento riba  funccionamento di Serlimar y e maneho cu gobierno y e minister di medio-ambiente lo kier bay ehecuta al respecto.
Na di dos lugar gobierno lo mester presenta parlamento cu e presupuesto di 2019 y obviamente tur wowo, particularmente di Hulanda, lo bay ta dirigi pa evalua si gobierno a cumpli cu e condicionnan impone pa gobierno di Reino pa reduci gastonan y nos pueblo lo ta tambe curioso pa sa si tin mas medida na caminda.
E preludio pa loke lo bay acontece na parlamento den e luna di augustus NO ta mustra di lo bay ta di un forma profesional. Ya caba nos por a tuma nota den medionan di comunicacion e comentarionan y particularmente e atakenan personal cu e diferente miembronan di e partidonan politico cu representacion den parlamento ta dirigi na otro. No ta intencion parce pa discuti riba un tema specifico, pero mas bien e intencion ta pa desacredita e persona (kill the mesenger to kill the message). E situacion sinembargo a bira mucho mas alarmante ora nos tuma nota di comentarionan cu Minister-Presidente y e minister encarga cu medio-ambiente ta hasi respecto e recohemento y procesamento di desperdicio.
Publicamente e dos mandatarionan ta duna di conoce cu parlamento mester sea baha cabes y acepta e reglanan y condicionnan  impone pa e minister di medio-ambiente of mester atene nan mes na e consecuencianan di un posibel decisionnan controversial pa cu e maneho di e minister. E minister di medio-ambiente a bay asina leu di intimida parlamento cu su declaracion di “laga e cero di Parkietenbos sigui subi numa”, si encaso esey ta e deseo di parlamento y pio ainda a alerta cu lo mester carga e consecuencia pa e contractnan cu ya caba a wordo cera. Contractnan miyonario cu sponsornan y sin ningun tipo di destaho publico y cu ta totalmente innecesario.
Pa colmo e minister a duna instrucionnan na Serlimar pa evalua un tarifa nobo pa recohemento di desperdicio. Kico esaki nifica? Ta ken ta manda defacto e ora na Serlimar, e minister of e hunta di supervision y e directornan? Y e instruccion aki di e minister ta un knock-out directo pa e sindicatonan cu a dialoga cu e minister manera FTA como tambe sindicato manera STA cu a apoya e minister 100%. E minister a duna atrobe muestra  di menosprecio, pasobra su unico intencion tabata pa “span nan voor zijn karretje” cu otro palabra manipula nan pa su propio beneficio y ela logra esey tambe. Awor aki e siguiente bataya lo bay tuma lugar na parlamento, pasobra gobierno ya ela logra hipnotisa nan cu su maniobranan y manipulacionnan y e tin un pa un den su gara.
E pregunta grandi ta awor, elo logra pa convence Parlamento cu e lollypop y sigui cu su pachanga of parlamento lo bisé cu no ta e tarifa so ta e problema pero tambe e racha di desicionnan contra tur reglanan di Bon Gobernacion?
Parlamento lo para pa e consequencianan di e lucha noble pa Aruba realmente wordo goberna a base di e reglanan di Bon Gobernacion?
Si no para pa esaki anto un biaha mas nos lo bai haya un show espectacular den parlamento aki poco dia y un biaha mas pueblo lo wordo masacra cu e “KARTELHEFFING” y e parlamento lo retene su titulo di “STEMPELPARLEMENT”!!

 

Den nomber di UPP.
Candelario Wever (lider)

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio