Home Politics Lider di fraccion AVP, Marlon Sneek Gabinete Wever Croes no sa...

Lider di fraccion AVP, Marlon Sneek Gabinete Wever Croes no sa kico pa haci ya cu no tin plan di maneho

SHARE

 

 

Desde 2009 pueblo di Aruba no a wordo confronta cu medida, economía di e pais no a wordo destabilisa den e forma cu esaki ta tumando luga den ultimo 9 luna y pa prome biaha desde 2009, ningún hende sa e rumbo cu nos país ta bayendo y kico lo bay pasa pa sigura nos pueblo cu cosnan lo bira positivo, lider di fraccion di AVP, Marlon Sneek ta declara.

El a sigui mustra cu e pregunta grandi na e momentonan aki, na inicio di un serie di medidanan cu gobierno MEPPORRED no tin control ariba, kico lo bay pasa den proximo luanan, sigur despues cu siman pasa gerencia di WEB Aruba NV, a informa gobierno cu mester bay aumenta prijs di awa y coriente.

“E unico reaccion di prome minister riba esaki tabata su preocupacion grandi con un carta interno asina, por a wordo publica pa medionan di comunicacion legal pero informa pueblo riba solucionnan cu su gobierno tin prepara y cu lo wordo ehecuta pa evita e aumento aki, no a wordo anuncia pa prome minister.

WEB Aruba NV ta un compania estatal, un compania cu ta di pueblo pero aparentemente pueblo no mag di haya informacion riba kico ta pasando cu e compania y kico ta bay pasa cu prijs di awa y coriente, mas ainda despues cu e mesun politiconan di e partido di prome minister, ta sigura durante di campaña electoral, c’un di su puntonan cardinal di e maneho cu su gobierno lo hiba, ta di reduci prijs di awa y coriente.

Desde 2015 gabinete Mike Eman a bin ta reduciando gastonan di gobierno, buscando solucionnan concreto ya cu bou di ningun circunstancia kier a impone medida riba pueblo pero al contrario na cantidad di ocasion, a dicidi di duna pueblo algo bek pa yuda cubri gastonan y caminda reparatietoeslag sin duda ta e miho ehempel di esaki.

A yuda famianan cubri gastonan di un aña escolar nobo, a percura pa sostene mamana soltera, duna esunnan cu ta depende di bijstand, un tiki mas espacio y a duna pensionadonan algo extra riba nan pensioen.

Tur esaki tabata posibel a base di un maneho concreto y efectivo, caminda gabinete Mike EmanI y II tabatin e determinacion cu por saca e pais dilanti, despues di e crisis real cu gobierno di MEP a laga e pais aden na 2009.

Un crisis caminda economia a cay formalemente na 2008 alrededor di 13%,  desempleo a aumenta formalmente te cu 12%, inversionnan no tabata tuma luga, forsa di compra a bay atras y un stagnacion serio y peligroso den turismo di e pais, e pilar economico principal.

Gabinete Mike Eman I y II ningun momento a pensa riba introduccion di medida, al contrario a dicidi di reduci BBO cu 1.5% pa alivia e peso cu gabinete Nelson Oduber a pone riba lomba di pueblo y a busca solucionnan pa crea mas cupo di trabou, inverti miyones den enseñansa drechando scolnan cu tabata den mal estado y cu nunca a haya atencion di gabinete Oduber,” Parlamentario Sneek ta señala.

 

Gabinete Mike Eman II a traha duro  y a logra di reduci deficit for di -9.4% na 2013  te cu -0.5% na 2017, cu ta un diferencia di 500 miyon florin den cuater aña, pues cu ta 125 miyon pa aña, sin cu mester a tuma medida, sin cu mester a hinca man den cartera di pueblo pa logra esaki.

“Medidanan di partido MEP  ta bay haci net lo contrario caminda lo saca mas cu 125 miyon florin for di economia pa aña, y e ta saca e placa for di saco di famianan cu ta bay sinti e perdida di forsa di compra. E placa ta bay sali di comercio y industria cu ta bay tin menos placa pa inverti, menos pa paga trahadornan, menos pa mantene servicio, menos pa expande y crea trabou nobo. Esaki ta bay tin como consecuencia cu ta bay tin menos espacio pa mehora e contractnan di trabou.

Companianan ta bay por inverti menos y esey kier men cu menos hende lo haya trabou y hasta por bay perde trabou dor di falta di inversion y mantencion y desempleo lo subi dor di esey. Dor di cu forsa di compra di tanto famianan como di companianan ta cay cu mas cu 10%, comercio y companianan lo bende menos y haya menos entrada.

E spiral negativo di caida di entrada,  caida di inversion, aumento di desempleo, perdida di forsa di compra den tur sector lo wordo sinti tur caminda y esaki no ta un prognostico negativo pa spanta hende pero esaki ta loke ta sosode cu  cualkier economia y mercado laboral ora un gobierno tuma medidanan asina pisa,” Parlamentario Marlon Sneek a declara.