Pa Minister di Husticia mr. Andin Bikker ta un honor y placer pa ta na e etapa pa haci apertura di un facilidad nobo pa cu e servicio di IASA. Diabierna ultimo e apertura a tuma luga di e facilidad na Vondelaan unda antes tabata oficina di dokter Meelis. Segun Minister Bikker momento cu el a asumi responsabilidad como minister, el a haya peticion pa busca un luga un tiki mas central y un tiki mas adecuado pa e servicio. Motibo di esaki, pasobra IASA awor ta duna e servicio di aplicacion pa prolonga estadia turistico. E edificio nobo na Vondelaan pa IASA ta uno mas adecua pa por atende cu e pilar mas grandi di Aruba cu ta turismo. Diligentemente cu e team na oficina di Minister a busca un luga pa haya uno adecuado y den ultimo simannan a haci tur preparacion pa ekipa e oficina debidamente. Los di esaki segun e mandatario, Aruba tin su retonan na frontera y sigur un di e instancianan cu ta atende cu frontera y ta e prome cu turistanan ta topa cune ta IASA. Tambe ta trahando pa IASA bay over pa traha hunto cu Warda nos Costa pa cu vigilancia di fronteranan. Segun Minister Bikker, e sa cu tin retonan pa loke ta vigilancia di frontera y siguramente e instancia cu ta creando cu ta bay yama Inmigracion Aruba ta bay ta uno robusto y uno cu ta bay enfrenta y ekipa pa enfrenta e retonan cu pais Aruba ta den. Diligentemente a sinta den ultimo lunanan cu sindicatonan pa tin un draagvlak amplio pa e cambionan cu ta bay tuma luga segun Minister di Husticia mr. Andin Bikker.