Prome Minister Evelyne Wever Croes, a durante di un conferencia di prensa recientemente, a informa cu despues cu ARA haci un investigacion riba e Jaarrekening 2017, gobierno lo tuma paso penal si tin algo ilegal den e cuenta anual aki y aki lider di fraccion di AVP, sr Marlon Sneek ta mustra.
Aki atrobe ta un gobierno cu a priminti transparencia, cu a priminti cu lo bay respeta organonan den nos sistema constitucional, entre otro Algemene Rekenkamer y aki segun Parlamentario Sneek, por a tuma nota cu tanto Prome Minister como Minister di Finansa, ta cuminsa tira para sin cu nan a laga Algemene Rekenkamer haci su trabou.
“Loke nan mester bisa ta cu nan ta laat, cu despues cu a traha duro pa pone cuentanan anual na ordo, cu dia prome di juni tabata deadline pa e cuenta anual wordo entrega y ta te algun dia atras esaki a wordo entrega, ta esey mester a bin dilanti caminda un biaha mas gabinete Wever Croes a faya y ta laat pa entrega cuentanan anual.
Pero nos ta scucha minister ta papia di investigacionnan pero aki tin cu mustra cu cuentanan anual, minister mester tuma esaki mande pa Algemene Rekenkamer pa nan controla e cifranan aki pa mira si e cifranan aki ta cuadra, anto despues di esey nan ta mande pa Parlamento pa nan atende cu esaki.
Ora bo ta traha un presupuesto, gobierno ta pone su pensamento riba papel, cuanto e ta kere ta bay haya na entrada y con ta bay gasta e entradanan aki.
Pues di den e presupuesto bo a bisa cu bo ta bay haya 100 miyon na belasting y na final di dia resulta cu gobierno no a haya 100 miyon pero a haya 90 miyon, y mester a uza otro entradanan pa cubri e gastonan, bo no a haci nada contra di ley.
Pasobra un presupuesto, manera nan ta bisa na Ingles, ta un ‘forecast,’ ta un pensamento di kico segun gobierno, segun su cifranan, e ta haya na entrada y tur caminda na mundo, na Aruba, Corsou y Bonaire, na Hulanda, bo presupuesta algo y na final bo ta haya mas of bo ta haya menos di loke gobierno a presupuesta.
Esey no kiermen cu tin algo ilegal cu a tuma luga, pero nos a ripara cu nan mes a leak un paar di informacion cu tur cos ta mustra cu e monster cu nan kier a pinta di 93% di nos dept to GDP, no ta asina, pues nan ta buscando manera pa saca nan curpa afo di locual nan mes a bisa.
Nos conoce e lider aki cu ta bisa un miyon di cos pero nos sa cu un ta gañamento y ta di lamenta c’un persona cu a bisa cu nan ta bay respeta institutonan, no ta duna e instituto espacio pa traha.
E minister presidente no por sali y cuminsa duna su pensamento politico riba un jaarrekening, sin cu el a laga ARA haci su trabou riba e cuenta anual aki.
Si e ta papia di investigacion, esaki ta totalmente un otro cos, caminda e tin cu bay haci un peticion na ARA pa mira si e ta bay asina leu of sino e tin cu haci uzo di su CAD si e ta kere cu lo tin algo ilegal cu a tuma luga eynan.
Atrobe aki minister presidente kier crea nubianan pa simplemente purba di core pa locual ta e mentiranan cu nan mes a trece dilanti.
Awe nan propio palabra ta papia di un 91 miyon cu tabatin na debe, kiermen atrobe si e gobierno no a cambia, cu AVP a sigui e ruta cu e tabata siguiendo, ya cu no mester lubida cu ainda tin un FMSA cu ta e ‘marketing fuel cu RDA mester paga gobierno p’e, cu eynan mester a drenta 76 miyon.
Si nos kita e 76 miyon florin aki for di e 91 miyon florin cu tin den e jaarrekening aki, cu nan a bisa cu tin, pasobra nos di parlamento no a haya esaki ainda. Ban sigui pa AZV caminda gabinete Wever Croes a bin pralamento pa fia mas placa pa duna AZV pero na final di cuenta a bin sali afo cu AZV a duna un rapport anual cu ta mustra cu nan tin un cero plus e aña aki.
Asina nos por sigui cu e gobierno aki a purba di infla e presupuesto 2017 pa laga e gobierno saliente mustra malo pero manera mi a bisa y lo mi sigui bisa esaki, mo ta orguyoso di a forma parti di Parlamento di Aruba e ultimo ocho aña pasobra awe nos tin institutonan cu bo por conta cu nan y bo ta bay haya e berdad.
No ta loke Marlon Sneek ta bisa pero e jaarverslag ta bisa bo cu tabatin un cero plus e aña cu a caba di pasa y ta gabinete Wever Croes a bay fia ma splaca pa pone 6 miyon disponibel pa renoba bestuurkantoor cu no tabata den e plan di gobierno anterior pa haci esaki na 2017.
Pues ora cu tuma tur e cosnan aki na consideracion hunto, nos por saca e conclusion cu si gabinete Mike Eman a keda na poder, nos lo tabatin un jaarverslag di 2017 cu lo a klop cu locual e presupuesto tabata bisa.
Pero nos a haya un gobierno cu a scoge pa crea un ‘smoke screen,’ crea desorden rond di e tema y bin bisa cu ta un mega debe a keda atras, cu ta un desaster economico a keda atras, desaster financiero a keda atras y ora cu nan a bay nan presupuesto 2018 nos por a mira den e supuesto desaster cu nan ta papia di dje, nan a hisa nan a hisa nan presupuesto cu 125 miyon,” Parlamentario Marlon Sneek a mustra.