Ta sumamente importante pa un minister papia berdad y Aruba tin un minister president cu a bisa na inicio di e gobierno aki cu tin 10 mil na Aruba pero di otro banda nos tin un minister plenipotenciario na Washington kede a bisa cu tin 20 mil Venezolano (legal y ilegal) na Aruba y ningun hende a scucha nan dos splica con nan a yega na e cifranan aki.
Esaki miembro di fraccion di AVP, Parlamentario Robert Candelaria a mustra na prensa indicando cu e minister di husticia, kende ta encarga cu cartera di husticia y integracion, mester ehecuta maneho pa stop entrada ilegal na Aruba y deporta esumnnan cu tey di un forma ilegal na Aruba.
E parlamentario a sigui mustra cu ta un rekisito pa bo por bin c’un maneho, ta cu bo mester di cifras y ya caba tur hende por mira cu e gobierno aki hopi biaha ta kibra algo, cu tabata funciona bon di e gobierno anterior of nan ta haci como si fuera ta nan mes a inventa e plan.
“Gobierno anterior tabatin algo cu yama ‘Ketenpartneroverleg’, caminda tur servicio cu tin di haber cu e maneho di combatimento di ilegalidad y integracion manera KPA, VDA, DBB, IASA, Dimas, GNC, Directie Arbeid etc, tabata reuni y comparti informacion y cifras riba ilegalnan na Aruba.
Tabata stipula maneho. Si e gobierno actual tabatin idea pa mehora e ‘Ketenpartneroverleg’ lo tabata bon pero pa desmantela esaki sin tin algo miho pa pone na su luga, ta desastroso.
Den un situacion vulnerabel manera nos ta aden awor pa cu ilegalnan drentando nos isla, minister ta tira afo e unico plataforma di coperacion y intercambio di data.
Con bo por haci algo asina?
E desicion aki no tin ningun sentido y ta un prueba cu e minister no ta compronde e materia.
Den e temponan aki cu mas y mas hende ta purba drenta Aruba via nos costanan, ta importante pa tin un plan bon hinca den otro con pa tackle ilegalidad. Mester pone tur e servicionan cu tin di haber cu combatimento di ilegalidad y integracion, traha hunto.
Mester aloca placa y hende unda esaki ta nesesario. Nada di esaki nos ta mirando. Asina por bisa cu nos no a tende ainda kico ta e plan pa cu e radar nobo pa cera buraconan actual.
Ta papia di helicopter pero no ta papia di traha hunto cu e partner manera Warda Costa cu ya tin esaki. Minister no por suministra nos cu cifras real of un calculacion realisico pa bisa cu certesa cuanto ilegal tin, con nan a drenta y kico ta e plan di minister pa combati esaki.
Minister a bisa cu e aña aki a deporta 800 ilegal. Si acaso e cantidad cu prome minister of minister plenipotensiario a menciona ta basa riba hecho, e cantidad aki di 800 ta masha poco.
E minister aki tampoco no a substancia e cifra aki.
Een druppel op een hete plaat.
Mi por imagina cu e minister di husticia ta desea di tin cosnan pa celebra, mirando cu ta celebra WiFi y bariopost, pero no mester duna informacion cu ta infunda pa purba haci pueblo contento. Robert Candelaria miembro di fraccion di AVP den Parlamento a declara.