Home Politics Parlamentaria Marisol Lopez-Tromp papiando riba ehecusion di e Crisis Plan Social

Parlamentaria Marisol Lopez-Tromp papiando riba ehecusion di e Crisis Plan Social

 

Cada debchi di dje ta wordo bira tur banda pa e wordo bon utilisa na bienestar di e hobennan, e muchanan y e famianan

 

Siman pasa Parlamentaria di POR, Marisol Lopez-Tromp tabatin un reunion cu Directora di Departamento di Asuntonan Social, Glenda Hernandez pa tin un update di ehecusion di e Crisis Plan Social.

Lopez-Tromp tabata presente den e reunion den su calidad di lider di Fraccion di POR den Parlamento, como miembro di e comision di supervision di e Crisis Plan Social y tambe como presidente di e comision fiho di Parlamento di Asuntonan Social, Hobennan, Famia, Grandinan y Salud.

El a indica cu Parlamento a sostene e 17 miyon di e Crisis Plan Social mirando cu e ta un necesidad grandi na e momentonan aki y awor aki Gobierno ta den e fase pa sinta cu tur e departamentonan y instancianan concerniente, cual proceso lo continua ya cu e ta un proyecto participativo.

Hendenan kier sa con leu e plan ta y kico ta loke gobierno a bin ta haci te cu awor y den e cuadro aki como miembro di Parlamento, Marisol Lopez-Tromp a bishita y reuni cu diferente instancia.

El a reuni cu Directora di Departamento di Asunto Social pa haya e update necesario. Tambe el a bishita Bureau Leerplicht pa haya bista di e parti di enseñansa ora e hoben keda sin presenta na scol sin cu e scol sa e motibo. Aki el a haya un bista di kico nan ta haci eynan y con nan por wordo yuda pa preveni cu nos muchanan por cay den crisis of ora nan ta den crisis con por yudanan pa loke ta e parti di enseñansa. A reuni cu Bureau Sostenemi caminda cu e Parlamentaria di POR a haya un bista total di e listanan di espera di mas cu 2 aña na varios instancia. E instancia aki tambe a sinti e crisis na e momento cu e mucha y hobennan no por a wordo yuda na e momentonan cu nan tin mester pa diferente motibo manera por ehempel, falta di personal, falta di placa, prioridadnan robes durante gobernacion anterior unda cu a pidinan pa economisa, y no tabatin  trahamento hunto manera debe ser entre e diferente instancianan. Lopez-Tromp a reuni tambe cu Directie Voogdijraad pa haya un bista di kico ta e aspectonan cu nan lo kier mehora den nan servicio na bienestar di nos muchanan, tambe riba kico nan a bin ta haci caba y kico nan lo bay traha riba dje. A bishita igualmente KIA unda cu el a presencia no solamente adultonan, pero tambe e hobennan y a papia cu esnan cu ta traha eyden riba e situacion actual, riba kico nan tin den mente pa ora e personanan ta den KIA, pero tambe ora nan sali, por ehempel kico ta e speransa cu nan tin y kico nan ta traha riba dje pa prepara pa drenta bek comunidad.

Marisol Lopez-Tromp ta menciona esakinan pasobra ta importante pa menciona con e 17 miyon Florin di e Social Crisis Plan ta wordo uza. E ta sigura cu cada debchi di dje ta wordo bira tur banda pa e wordo bon utilisa na bienestar di e hobennan, e muchanan y e famianan na prome lugar.

Bayendo riba e parti di con e 17 miyon lo wordo reparti, el a indica cu pa e parti di prevencion tin un suma di aproximadamente 2.3 miyon poni pa diferente departamento y instancia. Pa ayudo boluntario y obligatorio hudicial tin un total di aproximadamente 7 miyon y e parti di ayudo di mucha y hoben special lo haya 2.4 miyon, mientras cu diferente otro proyecto importante lo haya alrededor di 5.6 miyon.

“Parlamento di Aruba tin e compromiso, y sigur ami mescos cu demas colega cu ta enfoca riba e parti social,  pa percura pa e placa wordo destina y uza na e momento cu e departamentonan mester di dje. Nos sa cu tin un proceso burocratico, pero e meta ta pa e wordo bon destina y mi no tin duda cu e departamento y instancianan a traha y ta sigui traha duro pa percura pa e placa yega na su meta”, Marisol Lopez-Tromp a declara.

El a agrega cu Parlamento lo sigui vigila e proceso aki y lo invita Departamento di Asuntonan Social y otro instancia pa acudi na Parlamento pa duna un update y cada biaha lo duna un briefing na comunidad di Aruba riba con leu ta pa yuda nos hobennan keda den e bon caminda y si nan cay den un crisis, pa nan wordo yuda mas lihe cu ta posibel.