Abuso di ruman pa ruman Mike pa Ven Eman aregla door di suegra pa suegro Marieta pa Mike De Meza a wordo para
Parlamentario Endy Croes ta un di esnan cu a opone fuertemente riba e placa cu Ven Eman, ruman di Mike Eman tabata ricibi como sponsorship pa un auto di careda. Desde 30 di November 2017 manera gobierno a sinta Endy Croes a haci preguntanan oficial riba esaki. Februari 2018 a ricibi contesta unda publicamente a expresa su disgusto den conferencianan di prensa como cu entre otro pista di Palo Marga mes ta na werki.
Minister di Deporte Dangui Oduber desde e tempo ey a avisa ATA cu no lo continua cu e sponsorship aki mas. ATA a confirma cu den ultimo 6 aña ATA a sponsor Ven Eman ruman di ex Promer Minister Mike Eman 1.6 MIYON florin pa su auto di careda core na Merca. Tin otro coredornan manera di “The Bull Racing” a core 10 aña na Merca y a ricibi solamente 1200 dollar den 10 aña. Pues ta hopi cla cu Mike Eman y Mike De Meza tabata usa nan poder politico di ruman pa ruman y di suegra pa suegro pa asina por a faborece ruman di Mike Eman, esta Ven Eman.
Locual a sorprende nos ta cu aun pafor di gobierno suegra di Mike De Meza, presidente di ATA a firma 2 di Juli ultimo pa Ven Eman ruman di Mike Eman bolbe ricibi 810 mil florin pa entre otro cumpra un auto di careda nobo y sigui core na Merca unda Aruba ta paga tur cos. Esaki ta impugna cu e vison di e Coalicion actual y sigur contra e vision di e minister y pa Parlamento esaki ta intragabel. Siman pasa ainda Ven Eman tabata tin e curashi pa anuncia den prensa cu tur cos lo sigui comun y coriente pasobra E, esta Ven Eman ruman di Mike Eman aparentemente no a ricibi un anuncio oficial di ATA.
Mi pregunta na Ven y Mike Eman y Mike De Meza, boso no ta compronde cu gobierno a cambia y fiesta a caba? Boso no a abusa demasiado caba cu placa di e humilde pueblo aki? Boso no tin nocion? Boso compas a “trip”? Boso no tin gevoel? Boso a desgracia nos finansas publico di tal manera cu lo dura nos mas cu 20 aña pa drecha esaki. Despues di hopi presion nos a compronde cu Director di ATA porfin a anuncia publicamente cu ATA no lo continua mas cu e sponsorship aki.
Mi ta spera cu esnan cu a abusa di e pueblo aki ultimo 8 añanan por a compronde e mensahe y acepta esaki na bienestar di nos comunidad. Parlamentario Endy Croes a splica cu e trabou no a termina aki pasobra carta a sali pa otro companianan estatal manera Utilities, AAA, APA, SETAR pa mira unda mas Ven Eman y su ruman Mike Eman tabata chica placa pa e auto di careda aki. Tanten cu no tin pa Palo Marga no por tin pa un solo famia, esta famia Eman. Laga e vison y aviso aki ta cla y raspa pa tur companianan estatal cu gobierno a cambia y e maneho y vision tambe a cambia, Croes ta termina bisando.