Home Local Tropical Bottling Co. y ASOCOL ta invita comunidad Diadomingo ta celebra...

Tropical Bottling Co. y ASOCOL ta invita comunidad Diadomingo ta celebra 208 aña di Independencia di Colombia

 

 

ORANJESTAD, Aruba – Diadomingo awor dia 29 di Juli, Colombianonan na Aruba ta celebra 208 aña di e independencia di Colombia. Tropical Bottling Co. hunto cu Asociacion Amigonan Colombiano (ASOCOL) lo celebra cu un fiesta desde mainta te oranan laat di anochi na Balashi Beer Garden.

 

Tropical Bottling Co. ta spera Bo diadomingo awo, specialmente e comunidad Colombiano, pa yega Balashi Beer Garden y celebra Dia di Colombia. Richard Giel, Coordinador di evento special di Tropical Bottling Co., a splica cu lo tin diferente actividad manera cuminda tipico y hopi musica cu e asociacion a prepara. Tropical Bottling Co. ta encarga cu un bar bon surti cu productonan local manera Chill, Balashi y tambe e liña di Coca Cola lo bay t’ey.

 

E idea di e evento aki segun Moises Fernandez, Presidente di Asociacion Amigonan Colombiano (ASOCOL), ta pa tene un evento familiar. Desde cu el a tuma e directiva over, a bira un tradicion pa nan organisa Dia di Independencia di Colombia. E aña aki ta celebra 208 aña di independencia y e asociacion a opta pa no haci un fiesta comercial pero un actividad familiar.

 

Mayornan por bin pasa e dia aki hunto cu nan yiunan. E evento no ta solamente p’e comunidad Colombiano, pero tur comunidad cu ta forma parti di Aruba lo participa diadomingo den e celebracion di independencia di Colombia.

 

E evento lo cuminsa desde 10’or di mainta te cu 10’or di anochi y entrada ta gratis, pero tambe por haci un donacion na e asociacion. Tur hende lo por disfruta di e dushi musica di Colombia y di e presentacionnan di Sensacion Vallenata, Edgar y su Tambora, Grupo Pimienta, Miniteca del Arabe Amir, Jairo Silva. Tambe e muchanan lo disfruta di e Dino Jump y otro actividad, pero tambe lo tin sorpresanan cultural, variedad di cuminda y co’i bebe. Yega diadomingo na Balashi Beer Garden cu ta keda den cura di Brouwerij Nacional Balashi y cu ta patras di Total Cleaning na Balashi.

 

Tropical Bottling Co. y ASOCOL a invita comunidad di Aruba pa bin comparti e dia cu e comunidad Colombiano celebrando 208 aña di Independencia di Colombia.