Home » Pa Gabinete Wever-Croes salud di hende ta na prome luga: TA TRECE SOLUCION PA E PROBLEMA CU GOBIERNO DI AVP A OCACIONA

Pa Gabinete Wever-Croes salud di hende ta na prome luga: TA TRECE SOLUCION PA E PROBLEMA CU GOBIERNO DI AVP A OCACIONA

by Admin
0 comment 67 views

 

E situacion riba e tereno di Waf na unda trahadonan ta worde afecta cu e huma di WEB a trece preocupacion y indignacion cerca Gobierno di Aruba pasobra ta trata di salud di hende, segun Prome Minister Evelyn Wever-Croes. Riba esaki Prome Minister a duna un ‘update’ di e situacion aki.

 

E mandatario a splica cu na momento cu e Gobierno anterior a muda Waf pa Barcadera, ya WEB tawata eynan caba pa hopi tempo. Desde cu Waf ta situa den e becindario menciona, WEB a sigui opera mes cos dus no a cambia nada den loke ta trata e produccion y e uzo di ‘heavy fuel oil’ cu nan ta uza. Sinembargo pa casualidad, segun Prome Minister a expresa, cu e cambio di Gobierno na fin di 2017, e trahadornan riba tereno di Waf a cuminsa sinti molester di e huma di WEB.

 

Gobierno a reuni cu WEB cu den principio a duna di conoce cu nan no ta esun cu mester bin cu e cambio pasobra nan no a haci niun cambio den e forma cu nan ta produci energia. Y Gobierno di AVP no a haci niun investigacion prome cu a move Waf na Barcadera. Gobierno aki a pidi WEB pa nan busca un solucion pasobra aki ta trata salud di hende.

 

E solucion mas facil, lihe y di menos gasto awo aki ta pa cambia e ‘heavy fuel oil’ cu WEB tawata haya for di RDA pa por genera energia. E azeta aki cu WEB tawata uzando tawata contene sulfer na un cantidad te cu 3%. Awo lo bay na un ‘heavy fuel oil’ cu ta contene menos sulfer te na 1.5% maximo.

 

“Esaki ta un ‘heavy fuel oil’ mas caro y cu no a tene cuenta cu n’e den nos proyeccionnan sinembargo ta algo cu nos mester haci pasobra Gobierno ta di opinion cu no solemente mester papia di energia limpi y alternativo, no solamente mester papia di proteccion di medio ambiente, sino mester actua di biaha pa soluciona e problema”.

 

Prome Minister ta lamenta cu e gobierno anterior no a haci nada pa soluciona un problema cu nan mes a ocaciona pasobra el a permiti uzo di ‘heavy fuel oil’ cu un cantidad halto di sulfer te na 3%. Apesar cu esaki ta afecta salud di hende, Gobierno di AVP no a haci nada pa drecha e situacion aki. Gabinete Wever-Croes si ta soluciona y lo mehora e ‘heavy fuel oil’ cu ta bay uza na WEB. Cu esaki, e emision di sulfer ta bira menos y ta spera cu esaki lo ocaciona menos molester.

 

“Gobierno di Aruba a tuma e problema aki na serio inmediatamente. Durante 8 aña largo a scucha e gobierno anterior papia di proteccion di medio ambiente y a viaha rond mundo pa promove Aruba como un pais cu ta cumpli cu tur standard internacional, pero ora a trata salud di hende a bira lomba pa esaki. A permiti uzo di e crudo di mas sushi cu ta existi. Esaki a yena mi cu hopi indignacion. Y Gobierno a cambia esaki den accion y a busca solucion. Pasobra pa e Gobierno aki, salud di hende ta na prome luga”, Prome Minister Evelyn Wever-Croes a duna di conoce.

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio