Shiribana: Diabierna algo pasa di 1’or y mey di marduga, un patruya di polis atento ta spot e conocido di polis “Kabouter”, Kabouter tabata wordo busca como sospechoso di a comete atraco arma, den cual ela pone arma di candela na cabes di su victima, despues a coi su pertenencia y su auto, un Mitsubishi Outlander blanco bay cune.
Den oranan di atardi e ocupantenan di e Mitsubishi Outlander aki a horta den un Supermercado na Matividiri. Polis a sigui busca e auto aki, pero no a logra topa cune.
Diabierna marduga e patruya atento aki a bin topa cu Kabouter na Shiribana, na e cas pabou di Loxing Supermarket. E cas aki ta conoci pa polis, unda polis na varios ocasion mester a bay asistencia.
Kabouter mesora a wordo deteni pa tres agente policial femenino hopi balente, kendenan tabata sa di a domin’e y bisti’e boei. Hopi liher a yega mas patruya di polis pa refuersa e tres dama polisnan aki.
Polis no a topa cu e Mitsubishi Outlander, Kabouter tabata cu un Toyota Yaris blanco, e dama cu a tabata cu kabouter den e Mitsubishi Outlander den oranan di atardi tampoco tabata na e sitio.
kabouter a wordo transporta cu transportwagen di polis pa warda di Santa Cruz.
Na e cas unda a detene kabouter, tin varios adicto ta keda, e cas aki tin varios bisiña preocupa. Na e sitio un bisiña tabata comenta cu tur dia nan ta mira e benta di droga pasa nan dilanti y cu autoridad no ta haciendo nada pa stop e benta di droga na e cas aki. Segun un bisiña ultimamente te hasta turista ta bin buska nan droga eynan. Pues un situacion hopi fastioso, incomodo pa e personanan cu ta biba cerca di e cas aki na Shiribana.