Home Politics Ministerio di Asunto Social ta wak bek cu satisfaccion riba un JOEPI...

Ministerio di Asunto Social ta wak bek cu satisfaccion riba un JOEPI CAMP exitoso

 

 

E siman di 23 pa 27 di juli, Ministerio di Asunto Social y Labor den cooperacion cu Comercio di Aruba, a uni forza pa brinda nos muchanan un dushi vakantie den forma di un camp yena cu actividadnan sano.

Un iniciativa di Minister Glenbert Croes, bou direccion di Darlaine Erasmus y Rochi Geerman, cu a bira realidad den tur Centro di Bario aki na Aruba. Un camp cu a hospeda 630 mucha un siman largo. Un siman largo a ofrece nos muchanan ambiente, alegria, sonrisa, actividad, deporte, enseñansa. Un siman cu a siña nos muchanan comparti cu otro. Un siman di amistadnan nobo, un siman cu a duna nos muchanan perspectiva nobo.

“Nos ta sumamente agradecido y contento pa e cooperacion cu nos a ricibi di Comercio.  Desde e caso di e dos Angelitonan, Aruba completo a realisa cu ta hunto so nos por rescata nos Pais di su problemanan social”, Minister Glenbert Croes a expresa.

Joepi Camp a hospeda 630 mucha di tur skina di Aruba, un iniciativa cu lo keda organisa anualmente, esey Minister Glenbert Croes ta anuncia cu hopi orguyo.

E sonrisa den wowo di nos muchanan ta e motor di nos alma pa logra un miho Aruba y un miho porvenir pa nan.