Home Police Habitantenan na soño ta wordo sorprendi den nan camber, pa dos homber...

Habitantenan na soño ta wordo sorprendi den nan camber, pa dos homber cara tapa

Cashero: Diaranson pa mas o menos 3’or di marduga, patruya di Santa Cruz ta wordo manda cu urgencia na un adres na Cashero, pa motibo cu habitante di e cas a yama central di polis y a bisa cu nan tabata drumi y ora nan a spierta nan a topa cu dos homber cu cara tapa.
Mesora e patruya a bay na e dicho adres y na yegada e habitante a declara na polis cu e cu su ruman muher ta drumi den nan camber y nan a wordo lanta pa dos homber desconoci pa nan. E dos hombernan ki a cuminsa exigi placa y joyas, ambos tabata bisti na preto y tabata tin bril di solo. Un tabata color cla y e otro tabata color scur y nan tabata papia papiamento bon bon.
E habitante a bisa cu ela wordo gedal dos biaha cu un mokete na e banda rechts di su cashi pecho y pusha algun biaha bente riba cama. E desconocidonan a reboltea den full e camber y a coi 25 florin cu e habitante tabata tin den su cashi. Tambe nan a coi un caha cu algun joyas.
Despues esun color cla a cuminsa bisa ” ban mata nan” y e color scur a bise ” No, paso nan a comporta, nan no a grita”.
Despues e asaltantenan a pidi pa habri e porta di cas di dilanti pa nan sali, mesora e habitantenan a habri esaki y e dos hombernan a core bay drenta mondi.
Recherche y demas autoridad concerni a bay na e cas pa haci mas investigacion mientras e patruyanan di polis ta core y busca den henter e bario pa wak si por topa cu nan.