Home Local Blanco manera sneeuw!

Blanco manera sneeuw!



E grafnan di commandeur na Hato a keda blanco manera sneeuw despues di e trabounan di mantencion.

Stichting Monumentenfonds Aruba (SMFA)  banda di ta doño di diesdos edificio ta encarga tambe cu mantencion di algun obhetonan monumental. Dos siman pasa a cuminsa cu e proyecto di mantencion di e grafnan di commandeur na Hato. E grafnan aki ta monumentonan proteha tambe y por lo tanto mester cumpli cu un proceso pa por mantenenan debidamente.

Sr. Bremo ta encarga cu  e proyecto y ta un di e poco personanan cu ainda sa e proceso di kalki y lodo tradicional pa por drecha e grafnan na e manera original cu nan a wordu traha

E material pa blancha e grafnan ta un mescla di calki, aloë y awa. Prome ta drecha e grafnan cu piedra y  un mescla di klei, yerba y awa. Pa por keda bunita blanco e grafnan mester wordu blancha tres biaha

Hunto cu Biblioteca Nacional SMFA lo documenta e proceso aki tambe pa asina por preserva esaki aki pa den futuro pa restaura e grafnan den forma tradicional.

E grafnan di commandeur aki ta banda di EPB na Hato. Niun di e grafnan aki no tin un plachi cu nomber mas cual ta haci dificil pa por identificanan. Den pasado for di SMFA tin boluntarionan cu a haci algun investigacion cual ta e commandeursnan cu ta dera aki pero no a duna resultado.  E ultimo teksto cu ta conoci tabata di Jan van der Biest II pero esaki a desaparece rond di 1950 y ya no por indica cual ta e graf cu ta pertence na e.

Semper nos ta pidi como fundacion si tin personan cu tin mas informacion of potretnan di antes di e grafnan aki por tuma contacto cu nos na 582 4014 of info@monumentenfondsaruba.com


Watertoren Oranjestad

Un di e metanan di Stichting Monumentenfonds Aruba ta pa tene e monumentonan cu ta pertence na e fundacion den bon estado di mantencion. E siman aki un biaha mas nos a termina un otro trabou di mantencion esaki ta edificio di Watertoren Oranjestad sigur un joya di un monumento cu ta resalta den area di Oranjestad pa su grandesa, arkitectura y historia.

Anteriormente nos a haci mantencion na e famoso stadhuis conoci tambe como e edificio di casamento y tambe na e edificio cu actualmente e departamento di ARA ta ocupa conoci manera scol 1888

Na watertoren a tuma lugar trabounan di mantencion basta grandi. A drecha murayanan y verf e edificio y e toren completamente. Daknan a wordu cambia pa nobo y tambe a reemplaza tur e airconan pa unidadnan nobo.   

Pa locual ta SMFA nos ta hopi contento y agradeci cu e huurdo cual ta LAR cu a duna tur nan cooperacion den e simannan cu e trabou a tuma lugar pa asina por a traha den e edificio.