Home Local A.T.A.: Patrocinio Team Aruba no ta continua entrante 2018  Ta gradici y...

A.T.A.: Patrocinio Team Aruba no ta continua entrante 2018  Ta gradici y desea Team Aruba exito

A.T.A. a tuma nota di diferente publicacion referente aporte pa cu Team Aruba. A tuma nota di diferente discusion cu a surgi rondo di e topico aki y di e hecho cu a combina e topico aki cu diferente otro pensamentonan referente maneho di A.T.A. A.T.A. no ta opta pa drenta den discusionan cu ta considera di tin indole politico, pero sinembargo a dicidi di pa medio di esaki, aclaria lo siguiente, sperando cu e ta brinda claridad na un manera imparcial: 

 

Patrocinio Team Aruba no ta continua 

A.T.A. a base di decision di Minister di Turismo, cu nos ta consiente cu Minister a indica publicamente tambe, no ta continua cu aporte pa cu Team Aruba entrante 2018. Ta asina cu A.T.A. a bin ta duna su aporte a base di analisis nan haci, a base anual, na Team Aruba for di aña 2011. Anterior na esaki AHATA tabata carga e patrocinio aki.  Conforme procedura legal aplicabel pa A.T.A. ta evalua peticionan, analisa y presenta esakinan, den casonan unda procedura y ley di A.T.A. ta rekeri esaki, ta presenta esaki na Hunta di Supervision pa aprobacion. Consecuentemente esaki ta sigui su caminda pa Minister di Turismo, kende tambe mester duna su aprobacion. Team Aruba a ricibi notificacion oficial di e descontinuacion awe, 24 di juli 2018. Aki mester bisa cu na maart e aña aki ya caba a indica na Team Aruba cu no lo continua. E ekipo a sigui hasi su esfuerso pa sigura e patrocinio y como tal esaki a yega na Minister di Turismo recientemente, kende na su turno a comunica su decision tambe. A.T.A. ta gradici Team Aruba pa e relacion di trabow for di 2011 y ta desea Team Aruba hopi exito cu plan nan actual y cu esnan pa futuro. 

 

A.T.A. ta enfatisa: na tur momento ta actua conforme ley y proceduranan aplicabel 

Tambe ta tuma e oportunidad pa enfatisa e hecho cu A.T.A. ta traha na tur momento conforme ley y proceduranan vigente pa A.T.A. Esaki ta aplicabel pa ehecutivonan di A.T.A. y pa e Hunta di Supervision. 

 

Como e autoridad di turismo na Aruba, A.T.A. ta estricto den su maneho. Gerencia ta laga diferente compania independiente haci auditoria riba base cuartal y anual. Esaki a bin ta tuma lugar ya for di 2011, na momento cu Oficina di Turismo a bira independiente y orguyosamente por bisa cu tur aña ta cumpli debidamente cu entrega di entre otro e Rapport Anual, cu ta inclui resumen di resultadonan y di trabou haci, como tambe e relato financiero cu su respectivo ‘goedkeurende verklaring.’

 

Conforme ley, tin dos momento clave pa Oficina di Turismo, e prome ta ora di haci entrega di e presupuesto pa e aña siguiente y e di dos momento ta ora di entrega e Rapport Anual cu e resultadonan di e aña anterior. E Rapport Anual ta consisti di un rapport general, financiero, y un parti unda ta elabora riba e trabou di e Hunta di Supervision. Den e parti general di e rapport ta inclui un compilacion di e logronan di e diferente departamentonan den A.T.A., cual ta e departamento di Mercadeo, Strategia Investigacion (‘research’) y Planificacion, Destination Services, Recurso Humano, y e departamento encarga cu e aspecto financiero y maneho di facilidad di A.T.A.

 

Minister di Turismo ta aproba e Rapport Anual y e Presupuesto di A.T.A. Prome cu Minister aproba esakinan, nan ta wordo manda parlamento di Aruba ‘ter inzage’ y pa eventual comentario esaki pa un periodo di 10 dia di trabao. Djei Minister di Turismo por duna su aprobacion formal.

 

Pa A.T.A. e ehercicionan aki, esta produccion di su Rapport Anual y di su Presupuesto, ta extenso y di suma importancia y un parti integral di e maneho cu ta cana man den man cu ley stipula pa A.T.A. como tambe codigo di ‘Good Corporate Governance’ stipula pa A.T.A.

 

E auditoria financiero independiente anual ta ser conduci pa Ernst & Young, y esun per cuartal pa e oficina di accounting independiente PricewaterhouseCoopers.

 

A.T.A. ta pone hopi enfasis riba su maneho financiero y riba un maneho conforme ley aplicabel pa A.T.A., como tambe conforme locual ta constitui ‘Good Corporate Governance’.  E pasonan ariba menciona ta refleho di un maneho cu ‘Checks & Balances’ adecua unda A.T.A. ta entre otro wordo audita dor di companianan independiente, conforme reglanan internacional.

 

E proceso di auditoria na A.T.A. a inclui tambe un “dossierreview” di Centrale Accountantsdienst na 2016. 

 

A.T.A. ta spera cu esaki un biaha mas ta brinda splicacion riba e maneho estricto cu ta sigui den caso di maneho di oficina di turismo, cual ta asina esencial pa bienestar di nos pais y nos comunidad.