Den e simanan y dianan cu a pasa pueblo di Aruba por ta orguyoso di nos yiunan di tera cu a logra hopi pa deporte y cu a sa di pone Aruba su imagen hopi halto riba tereno deportivo. Den diferente ramo di deporte entre otro baseball, beach volleyball nos a conoce alegrianan di titulonan obteni y tambe clasificacion pa Olimpiada Hubenil y sin kita afo nos atletanan na Cartagena haciendo un tremendo papel. Pero den tur e alegria aki cu ta reina, tambe ta reina hopi tristesa y hopi preocupacion pa cu deporte y e rol di Lotto pa Deporte. Unda cu nos bay na Aruba nos infrastructura deportivo ta den estado pesimo y e atletanan, clubnan y federacionnan no ta sinti e aporte necesario di parti di Lotto pa Deporte. Mas bien Lotto a para bira un show di duna verf aki aya y laga pone nan logo manera ta gran cos nan a haci.
Canchanan den mal estado
Un berguensa grandi ta cu ni nos propio stadionnan nacional no por ser usa pa weganan internacional debi cu esakinan ta den mal estado y cu nan a ser desaproba, anto bo ta puntra bo mes unda e Lotto ta cu ta cambia bida di e atleta? Unda bo bira nos canchanan deportivo ta den mal estado y falta hopi mantencion pero lo mas importante ta e falta di material adecua pa por practica e deporte manera debe ser. Ta di elogia mayornan, sponsernan, coachnan cu ta invertiendo di nan saco pa nos hobennan por practica deporte y cu nan por tene e nomber di Aruba na halto internacionalmente. No solamente nos atletanan, federacionnan, clubnan ta sinti e mal maneho financiero di Lotto, pero tambe rebendedornan di Lotto aki na Aruba unda cu bo ta wak cu hopi ta cerando nan negoshi cu no solamente ta un entrada extra pa hopi persona cu tin necesidad di esaki, mientras cu Lotto si a conoce un aumento den benta di 30%, pero niun hende no ta sinti e beneficio di esaki, pasobra tur placa ta bay Canada y na final ta un miseria nos ta haya a cambio y cu mayoria ta keda den un grupo su man.
Desconfiansa den Lotto
A yega momento pa nos Minister di Deporte di un bes pa semper fiha su posicion pa locual ta trata e situacion di Lotto pa Deporte. Hecho ta cu nos di parlamento a pasa un mocion unda cu nos ta expresa nos desconfianza den e manera cu ta maneha Lotto y unda cu un grupo cu ta den mesun bestuur ta haci negoshi cu Lotto. Esaki ta algo inaceptabel. Y sigur mi persona cu ta sali di mundo di deporte y ta wak con deporte ta sangra na Aruba y sin conta deporte escolar y infrastructura deportivo escolar, ta urgi nos Minister di Deporte sr. Dangui Oduber pa no gasta mas placa den corte pa bringa y rescata Lotto di un grupo cu a secuestra Lotto pa deporte. Mirando cu no tin tempo pa perde, pa su excelencia fiha un posicion ki nos ta bay haci di una bes por todo. Mi persona ta haya cu ta mihor nos usa e placa cu nos lo a usa den corte pa trata na haya Lotto pa Deporte, nos hinca e placa aki den lanta un Lotto Nobo di pueblo pa Deporte.
Pueblo ta anhela e cambio
Nos no por keda core tras di hende cu no tin sentimento pa deporte, pero mas bien pa beneficio personal. Y mi tin sigur cu pueblo lo sa di sostene hunto cu rebendedornan p’asina den corto tempo esaki por ta un exito, pa nos por cuminsa wak progreso den deporte, unda cu nos por cuminsa na percura pa nos stadionnan nacional ta den condicion optimal y unda nos por cuminsa mehora infrastructura deportivo y percura pa materialnan pa por practica deporte optimalmente. Y cu nos por conoce un biaha mas Weganan di Reino. Pueblo ta anhela pa cuminsa sinti e cambio y ami como parlamentario lo sostene un decision di su Excelencia Dangui Oduber y lo traha hunto cu e Minister pa haci e cambionan lo mas pronto posibel pa nos por conoce un Lotto Nobo di pueblo pa Deporte, unda cu lo garantisa esnan cu lo kier bay over pa e fundacion di Lotto nobo aki cu nan lo no perde nada y por garantisa cu Pueblo por ta sigur cu e Lotto Nobo aki lo traha na beneficio di nos deportistanan. Pa finalisa mi ta bisa: E momento a yega!