Fraccion di AVP Gobierno ainda no a informa riba plan pa reduccion di gasto di personal Adaptacion di FEM mesun cos

Ya caba ta conoci pa cerca di un luna caba, cu Gobierno di Reino no ta contento cu presupuesto 2018 presenta pa gabinete Wever Croes y cu a aproba pa fraccionnan MEPPORRED caminda esaki a wordo participa na Prome Minister Wever Croes cual tabata di dos advertencia duna na e actual gobierno.
Fraccion di AVP ta mustra cu rapport di CAFT tambe a señala bon cla cu cambionan tin cu wordo haci despues di a tuma nota cu e presupuesto no a cumpli cu normanan stipula y esakinan tin cu wordo adapta ainda pa gobierno di Aruba.
Mesun cos ta e caso cu e nota presenta pa Minister di Finansa, Xiomara Ruiz Maduro relaciona cu su nota Financieel Economischa Memorandum valido pa 2018 te cu 2021 y caminda tambe tin cu mester introduci cambionan cu Prome Minister a priminti gobierno di Reino y CAFT, cu esaki lo tuma luga y cu a conduci cu e comision di supervision a firma e presupuesto 2018.
A base di e palabracionnan nobo aki haci cu tanto gobierno di Reino como CAFT gobierno di Aruba a crea e posibiliddad pa alarga permanencia di CFT te cu 2021, caminda e prome palabracion haci cu gobierno di AVP, permanencia di e comision di supervision lo a funciona na Aruba te cu 2018 ora cu gobierno lo a logra un presupuesto balansa c’un surplus di 0.5%.
Mientras cu ya caba ta un hecho cu e comision di supervision lo sigui despues di e aña aki ya cu gobierno MEPPORRED no por a cumpli cu e normanan stipula anteriormente, mester bay over na cambia e ley di LAFT existente den cual a determina cu e comision di supervision lo a termina cu su tarea e aña aki.
Precisamente net partido MEP cu pa ocho aña largo a cuestiona y a considera presupuestonan cu despues a conta cu aprobacion di CAFT como irealistico, a ser mustra dor di e comision di supervision financiero cu e presupuesto presenta pa gabinete Wever Croes ta irealistico.
Entre otro CAFT den su conseho emiti dia 11 di Mei ultimo, a mustra cu e comision a conseha gobierno MEPPORRED pa percura pa pa e ‘finacieringstekort’ den presupusto 2018, keda bou di esun di 2017.
Na mes momento CAFT a mustra cu argumentonan presenta pa gobierno di coalicion riba entrada a base di dividendonan, ta irrealistico y no ta cumpli cu e dificit di 2.8% bbp palabra pero cu esaki a bira 3.3%.
Diferente punto esencial e comision a mustra cu gobierno mester aclaria entre otro riba entrada di dividendo di Refineria di Aruba cu gobierno a stipula na e suma di 17.5 miyon den presupuesto 2018 y cu esaki lo no wordo logra.
Otro punto serio cu CAFT adverti gabinete Wever Croes ariba ta e hecho cu gobierno a dicidi di conta na dos ocsion e pago di dividendo di ATA pa un suma di 6.4 miyon y cu tambe gobierno tin cu bay coregi ainda den e presupuesto aki.
Debe nacional a wordo palabra cu gobierno cu esaki mester keda na 90% pero despues di tur control haci, ta bin resulta cu pa 2018 e debe nacional lo yega nba 92% cu tambe ta contra palabracion haci entre gobierno di Aruba y CAFT y cu tambe tin cu wordo adapta.
Sinembargo e punto cardinal cu a wordo atendi tanto pa CAFT y gobierno di Reino, ta e hecho cu gabinete Wever Croes a aumenta e gasto di personal a aumenta cu mas cu 10.5 miyon florin pero aki a yega na un palabracion concreto cu gobierno cu esaki tambe tin cu wordo reduci cu 12 miyon pa e aña aki ainda.
Te ainda gobierno no a duna indicacion algun con e ta bay haci esaki y CON e ta bay logra e reduccion aki y na varios ocasion Prome Minister a sigura cu lo no kita hende for di trabou pero a papia di areglo di VUT y eliminacion di ‘periodieknan’ cu ta un derecho di trahadonan.
Kico ta bay pasa no ta conoci ya cu gabinete Wever Croes, apesar di e situacion delicado aki cel a hinca su mes y e pais aden, a dicidi di b ay gosa di vacacion prome y laga interes di e pais pa mas lat.