Home Politics Parlamentario Edgard Vrolijk di MEP: “E problematica di  sulfur ta otro prueba...

Parlamentario Edgard Vrolijk di MEP: “E problematica di  sulfur ta otro prueba mas di e engaño GREEN di sr. Mike Eman”

 

 

Ultimo simannan cu a pasa e topico tabata e asunto di WEB unda ta usando fuel oil cu demasiado sulfur, cu ta afectando trahadornan di ASTEC y tambe tur esnan cu ta trahando riba e waf di Barcadera. No solamente e ta causando daño na e trahadornan pero tambe e equipo riba waf di Barcadera ta sufri daño. Anto cerca mi a bin e pregunta: esaki ta e Aruba Green cu sr. Mike Eman a propaganda? Di 2009 pa 2017 no a pasa un dia cu sr. Mike Eman tabata papia di su vision berde unda cu pa 2020 Aruba lo ta 100% riba energia alternativo y unda cu e vision aki lo bira un pilar economico cu lo percura pa empleo pa mas di 1600 hende.  Den un bunita reportahe traha pa Utilities Aruba NV na 2014, yama Aruba’s Sustainable Future a skirbi ampliamente con lo ehecuta e plannan y a sigura cu pa 2020 Aruba lo ta 100% riba energia alternativo. Den e vision aki di sr. Mike Eman, WEB NV mester a hunga un rol hopi importante. Unda cu sigur nos por a scucha cu WEB NV pa 2020 lo ta 100% riba energia alternativo unda cu lo bay over na haci uso di gas natural den forma di likido.

 

Proyecto di gas fracasa

Na 2018 nos ta topa e fenomeno unda  ta usando fuel oil cu hopi sulfur cu ta haci daño na hende y cu siguramente no ta nada berde y cu ta contradeci e reportahe di 2014 ya menciona. Banda di esaki ta tristo pa menciona cu danki na inversionnan den pasado di uso di Recip cu a contribui na baha e cantidad di fuel oil cu ta ser usa actualmente sino cos lo ta pio ainda.  Banda di esaki WEB NV a hinca 17 miyon pa prepara infrastructura pa e gas procedente di Ecogas pero cu na final di dia a resulta den un fracaso total y awo no tin e capital pa inverti den e ser humano cu ta sufri di e sulfur riba waf di Barcadera y esnan den vecindario. Si no a haci e mal inversion aki sigur lo tabatin fondo pa por a haci e inversion necesario pa por tin un mihor solucion pa e problematica aki na un manera mas duradero cu solamente cambia e uso di fuel oil pa uno cu menos sulfur.

 

Green Conference fracasa

Otro mal inversion tabata e Green Conference  hunto cu Europe meets the Americas, cu te dia di awe ainda mi ta spera riba contestanan di preguntanan cu mi persona a haci relaciona cu e gastonan di e proyectonan aki.  Un biaha mas mi persona a bolbe dirigi na Prome Minister pa nos por haya sa cuanto placa a ser gasta di WEB, Elmar y Utilities NV na Green Conference y tambe na Europe meets America pa nos tin un bista real cuanto placa a bay na e proyectonan y ta ken ta esnan cu a probecha di esaki. Y tambe pueblo kier sa cuanto placa a ser malogra na oradornan manera Al Gore, Richard Branson, Jose Maria Figuera, Wubbo Ockels,  unda cu na final di dia mester a percura pa por a crea 1600 cupo di trabao.

 

Contradiccion di vision Green

Den intento pa purba gana eleccion a sali di nan ideal GREEN pa bay purba hunga wega politico na purba bin cu reapertura di refineria cu ta contradeci nan mesun vision y cu na final di dia a costa pueblo mas placa enbes di a percura pa placa drenta den caha di gobierno y crea cuponan di trabao masal manera a ser propaganda. Pa mi persona ta hopi importante pa sa cuanto placa di pueblo a ser usa na e Green Conference y Europe meets America, p’asina nos por tin un bista real si esaki por tabatin efecto riba bahada di prijs di awa y coriente na Aruba.

Ta di lamenta cu e problematica di  sulfur ta otro prueba mas pa pueblo por wak di a ser engaña y sigur e vision GREEN di sr. Mike Eman tabata un fracaso total pero cu si a percura pa endeuda e pais aki, cu awendia alrededor di 90 cen di nos florin ta bay na paga debe, debi na mal maneho financiero no solamente pa loke ta caha di Gobierno pero tambe den nos companianan estatal.