Home Politics Minister Rudy Lampe: SEGURO PA STUDIANTE CU ‘ARUBALENING’ PA HULANDA

Minister Rudy Lampe: SEGURO PA STUDIANTE CU ‘ARUBALENING’ PA HULANDA

 

 

Dialuna mainta den Conferencia di Prensa di Gobierno di Aruba, Minister di Enseñansa Armando Lampe a elabora riba e ultimo desaroyonan tocante seguro pa studiantenan kendenan ta bayendo Hulanda cu ‘Arubalening’.

 

Minister Lampe a duna di conoce cu dia 30 di januari 2018, hunto cu Minister di Finansas, el a informa InsureToStudy cu Pais Aruba ta termina e acuerdo cu e tin cu e companía aki entrante 1 di januari 2019. Entrante e fecha aki, Pais Aruba no tin ningun obligacion mas cu InsureToStudy y e decisión aki ta final y vigente.

 

Mirando cu tin pregunta den comunidad riba con e seguro di studiantenan cu ta bay Hulanda e aña aki ta regla, e mandatario a informa lo siguiente:

 

Tur studiante cu ta bay Hulanda cu un Arubalening na augustus di e aña aki ta segura den e prome 5 luna, esta di 1 di augustus 2018 te cu 31 di december 2018. Desde 1 di januari 2019 nan mes por scoge un seguro di nan gusto.

 

E suma cu mester paga pa nan seguro ta Euro 54.50 pa luna, pues Euro 272,50 pa e 5 lunanan, y ta wordo kita di nan prome pago di Arubalening. Desde januari 2019 e studiante mes mester paga e seguro di su termijnbetaling.

 

Minister Lampe a indica cu na mei 2018 Departamento di Enseñansa a tene un destaho publico pa e proyecto “Verzekeringspakket voor in Nederland studerende Arubaanse studenten met een Arubalening”. Esaki a wordo anuncia via landscourant y corant local, website di Enseñansa di Aruba y website di Arubahuis na Hulanda.

 

Na total 5 compania a bin busca e bestek. A tene un reunion di informacion dia 3 di mei 2018. A traha un relato di e reunion ey y a manda esaki pa e 5 companianan interesa. Riba 29 di mei 2018, e dia stipula pa entrega e oferta, un compania so a duna su oferta. E compania aki a gana despues di a studia e oferta aki, e destaho publico cu un prijs di Euro 54.50 pa luna pa studiante, pa e pakete stipula. Pa mas información por check e website http://www.arubastudent.com/nl/

 

Minister Lampe a duna di conoce cu dor cu tur aña diferente mayor y studiante ta laga sa cu nan no ta contento cu e echo cu nan ta wordo obliga pa tuma e pakete di seguro cu nan Arubalening, esaki tawata e ultimo aña cu Gobierno a organisa e destaho publico pa e seguro di studiante pa Hulanda. Mescos cu tur studiante cu ta studia na otro país, studiantenan di Hulanda por scoge desde 2019 e pakete di seguro di nan gusto. Ta importante si pa enfatisa cu studiantenan mester ta segura prome cu nan subi avion te ora nan bin biba bek na Aruba.

Tur compania di seguro interesa por cuminsa prepara desde awor caba pa ofrece mayor y studiantenan nan pakete di seguro pa januari 2019.