Un parti di desperdicio municipal no ta yegando mas na Parkietenbos
Desde 1 di juli 2018, no obstante e retonan di implementacion, e acuerdo di maneho di desperdicio entre EcoGas y Serlimar ta den vigor. Ya caba ta cuminsa mira frutonan positivo pa cu e maneho di desperdicio y e futuro ambiental di Aruba.
For di algun tempo caba e dialogo ta tumando lugar pa asina por yega na un acuerdo con pa procesa tur desperdicio di Serlimar den un forma sostenibel. EcoGas tin basta aña caba ta procesando desperdicio di su clientenan. residencial y comercial den nan planta di separacion unda nan ta separa tur sushi den diferente fraccion pa entre otro reciclahe, re-uso y reduccion di masa di desperdicio. Den e forma aki ta reduci e volumen di desperdicio no re-uzabel cual ta wordo empaketa den forma sanitario y sostenibel den un bulto y bou maneho di Serlimar ta deposita esaki nan cu ta no-toxico den e landfill sanitario na Sero Teishi. E meta principal di e partnership strategico aki ta pa caba cu 90% di desperdicio na Parkietenbos. E acuerdo entre Serlimar y EcoGas riba su mes ta refleha finalmente un caminda positivo pa un maneho mas sostenibel y eficiente di Aruba su desperdicio.
EcoGas ta proyecta cu 40% di e desperdicio lo wordo separa y re-uza den diferente forma sostenibel como tambe prepara pa reciclahe. Despues cu sushi wordo separa na EcoGas ta reduci e volumen sobra cu aproximadamente 80%, asina ocupando menos espacio. E cantidad di sushi reduci cu no ta toxico, ta wordo compacta y warda den un envirobale, un material ecologicamente sostenibel cu ta evita holor, musca y otro molesternan desagradebel. Esaki despues ta wordo ubica den un area cual por wordo uza pa yena dumpnan ilegal of buraconan grandi cu despues por bira entre otro parkenan recreacional. E bultonan aki (Envirobale) a wordo diseña por medio di e industria di desperdicio pa facilita mas ainda e proceso di desperdicio rond mundo den general, e ta un solucion mas limpi y saludabel pa nos medio ambiente.
Rebaho drastico di tiramento di sushi na Parkietenbos
Prome cu juli 1, EcoGas tabata procesa un average di 3000 tonelada pa luna, awo cu Serlimar tambe ta depositando desperdicio e cantidad ta mucho mas. Tin indicacion, cu desde e acuerdo entre Serlimar y EcoGas a drenta den vigor, cu un parti di desperdicio municipal destina pa Parkietenbos ta yegando EcoGas y cu esaki ta consisti principalmente di desperdicio residencial. Mienstras tanto ta den espera di yegada di e parti di desperdicio comercial. E logro di mas grandi pa Aruba ta cu e desperdicio residencial aki no ta wordo deposita mas na Parkietenbos, mitigando e problema ambiental na Parkietenbos.
Desde su inicio na 1999, EcoGas su filiosofia ta uno di cooperacion na unda henter comunidad por uni pa remedia e gran problema di desperdicio cu ta reinando riba nos isla.