ORANJESTAD, Aruba – 23 di juli 2018: Hunta di Directiva di Aruba Hotel and Tourism Association (AHATA) a tuma nota di e declaracion di Parlamentario J.H. “Endy” Croes publica den corant siman pasa tocante alocacion di fondonan di ATA. “Nos ta aprecia e responsabilidad di Miembronan di Parlamento pa sigura cu ta aplica e proceduranan corecto den tumamento di decisionnan den entidadnan manera Aruba Tourism Authority (ATA)”, asina Tisa Lasorte-Henriquez, Presidente y CEO di AHATA a skirbi den un carta oficial na e miembro di Parlamento.
Ya cu Sr. Endy Croes ta menciona AHATA den su declaracion, AHATA ta aclaria lo siguiente.
- A base di ley AHATA por nomina 3 candidato den e Hunta di Supervision di ATA pa consideracion di Minister di Turismo. Despues, e Minister di Turismo ta nombra e miembronan di Hunta di Supervision di ATA pa medio di un Landsbesluit.
- Conforme cu e ley y reglanan di “good governance”, e miembronan di Hunta di Supervision di ATA ta miembronan independiente cu responsabilidad propio. Nan mester tene nan mes na reglanan di confidentialidad, irrespecto ken a nomina nan. Decisionnan ta tuma luga den seno di Hunta di Supervision, sin participacion di AHATA.
- Cada un di e miembronan den e Hunta di Supervision, incluso esunnan nomina dor di AHATA, ta eyden representando nan propio conocemento y experiencia y como tal ta tuma e decisionnan den forma individual y en conexion cu interes di ATA y Aruba.
- AHATA ta representa 100 compania cu ta brinda servicio den turismo na Aruba, no solamente 13 hotel. AHATA su meta ta pa sigura exito sostenibel di e sector.
AHATA ta spera di a aclaria e rol di AHATA den nombramento di e Hunta di Supervision di ATA y consecuentemente den e decisionnan cu ta tuma eyden.