Ta tristo pa mira con e parlamentario di AVP sra. Mervin Wyatt-Ras cu durante 8 aña largo a colabora cu Gabinete Mike Eman pa masacra un gran parti di e sector social den nos comunidad, awe ta critica e gobierno actual di MEP-POR-RED pa loke ta e maneho social hiba durante e ultimo lunanan aki. Nos tur por corda ainda con e gobierno cu sra. Wyatt-Ras a sostene ciegamente durante 8 aña – sin pone man na nan curason di piedra – a dicidi di corta drasticamente den subsidio di tur e fundacionnan social cu e consecuencia cu hopi di e fundacionnan aki mester a corta den nan servicio duna na nan clientenan y te hasta varios ta e fundacionnan aki cu a desaparece.
Cortamento drastico di subsidio
Asina nos por a mira con nos grandinan den e casnan di anciano di SABA a sufri y no tabata haya juice mas pa bebe y pa cu nan bienestar, trankilidad y situacion medico no por a drumi den airco mas. Nos hendenan special a bira victima tambe den e cortamento drastico di subsidio na SVGA y entre otro nos muchanan special no por a haya tratamento mas pa loke ta higiena bocal ni e transporte necesario. Esey tambe tabata e caso pa esnan kedando na Casa Cuna y Imeldahof. Un gran cantidad di esnan cu adiccion a wordo benta riba caya ya cu e gobierno a corta den e subsidio di varios di e organisacionnan aki cu tabata traha pa yuda e adictonan den nan rehabilitacion. Te hasta e fundacion FDEC cu tabata traha den dunamento di les den musica y arte na esnan menos pudiente den comunidad a ser elimina y nada otro a bin na su lugar manera cu Gabinete Eman a priminti.
Un milager inigualabel
Tur e maltratonan aki a pasa bao di nanishi di sra. Wyatt-Ras kende mester por tabata sa miho ya cu e ta carga un titulo halto den e ramo social. Pero awe cu un cara laba parlamentario Wyatt-Ras ta core cuestiona un gobierno y minister cu recientemente, esta na fin di april 2018 a ricibi 17 miyon florin extra pa yuda corigi tur e dañonan cu Gabinete Eman a haci contra e sector social. Pues den menos di 3 luna cu e presupuesto 2018 a ser aproba door di parlamento, sra. Wyatt-Ras kier a mira un milager inigualabel sosode bao di tur esnan cu a sufri danki na e maneho desastroso di Gabinete Eman. Un gabinete cu a laga e caha di gobierno completamente bashi atras cu rasca di huña so y cu un deficit di 155 miyon florin. Pues mester a warda te ora cu Parlamento aproba e 17 miyon florin extra aki y pa e ora ey numa por cuminsa uza legalmente e suma extra aki. Capice, sra. Wyatt-Ras?
Ehecucion di Crisis Plan Social
No mester lubida cu Minister di Asunto Social Glembert Croes poniendo e ser humano central atrobe a reuni cu mas di 20 instancia social den nos comunidad caba pa conhuntamente traha riba un Crisis Plan Social di mas aña y p’asina mitiga e desaster laga atras riba e area social door di Gabinete Mike Eman. E plan aki a ser presenta caba algun siman pasa y awor ta den fase di ehecucion. No mester lubida cu e 8 aña di deterioro social na man di AVP no por wordo corigi y soluciona den menos cu 3 luna. Talvez sra. Wyatt-Ras den su ignorancia no ta consciente cu bao di e gobierno actual a busca caba asistencia tecnico di UNICEF pa e cisisplan, a para tur ontheffing di e minister corupto di AVP, a para tur uitzendvergunning, a yega na un acuerdo cu CEDE Aruba y Samenwerkende Fondsen, lo hinca 1 miyon florin extra di FDA den e Plan Social, a bin cu Bario Fest y Ban Cultiva y tambe ta implementando e Start notitie nationale actie plan 2018-2020 pa un esfuerzo duradero pa pone nos hobennan na trabao etc.
Asina pues henter pueblo mes por mira e nivel abao cu sra. Wyatt-Ras kende como parlamentario tabata mudo pa 8 aña largo lagando e sector social na caya awe ta mustra su odio y vengansa contra tur loke ta na beneficio di nos comunidad y specialmente esnan di menos recurso. Un pais cu kier desaroya no ta ser sirbi cu un mentalidad mezquino y pober manera ta e caso cu e parlamentario ya menciona.