Home Politics Locual Marlon Sneek no ta splica pueblo: Tur e reportahenan di 2017...

Locual Marlon Sneek no ta splica pueblo: Tur e reportahenan di 2017 riba e situacion financiero di Aruba a demostra cu Gabinete Eman no a cumpli

Ta un berguensa pa henter nos comunidad ora cada biaha mester tende tur clase di disparate cu ta wordo ventila pa e parlamentario di AVP, Marlon Sneek. Un maestro di scol supuestamente bon educa kier sigui lansa su mentiranan y ta kere cu tur hende lo mester bay tras di su ponencianan ridiculo. E biaha aki sr. Sneek kier a bagatelisa e hecho cu otro luna, esta na augustus e ministronan di Gabinete Wever-Croes mester bin parlamento pa mustra con leu nan ta cu ehecucion di nan respectivo presupuestonan y cu si mester adapta esakinan lo por haci esaki ainda y p’asina evita cu nos ta wordo confronta na fin di aña cu e famoso presupuestonan supletorio. Pues algo hopi noble cu ta demostra cu e gobierno aki kier trece ordo den henter e desordo financiero cu tabata caracterisa e gobierno di AVP.

Gabinete Eman no a cumpli
Pero sr. Sneek den su ansha pa defende su partido AVP a core declara cu locual e gobierno aki lo bay haci na augustus awor ta algo cu Gabinete Eman semper a haci caba desde cu nan a haya CAFT riba nan lomba, esta cu cada 3 luna nan mester produci un reportahe di e situacion financiero di e kwartaal ey. Pues cu esaki no ta algo nobo cu e gobierno actual a inventa. Pero den e mesun rosea cu sr. Sneek ta alaba su gobierno di AVP, e mes no ta realisa cu durante 2017 tur e reportahenan di kwartaal pa loke ta e parti financiero a haya un ‘dikke onvoldoende’ di CAFT ya cu Gabinete Eman no tabata cumpli cu locual nan a priminti, esta di percura pa un situacion financiero cu ta cuadra cu e normanan stipula. Y hustamente pa e incumplimentonan aki mester a bin cu e presupuesto supletorio na fin di aña 2017 y esaki tabata 130 miyon florin. Pues ki bal bo ta produci cada tres luna un reportahe y pa na final di aña bo ta horca toch cu un presupuesto supletorio dramatico!

Reportahenan desastroso
Asina nos por mira den e reportahe di e prome kwartaal 2017, caminda CAFT ta señala cu “het financieringstekort voor de hele collectieve sector ultimo maart 2017 bedraagt 1,1% bbp. Over het eerste kwartaal is de tekortnorm voor 2017 van 0,5% bbp voor het hele jaar dus ruim overschreden”. Pues Gabinete Eman no a cumpli!
Pa loke ta e di dos kwartaal di 2017: “Op basis van de resultaten uit de tweede uitvoeringsrapportage concludeert het CAft dat het een uitdaging wordt voor Aruba om aan het einde van het jaar te voldoen aan de wettelijk tekortnorm van 0,5% bbp”. Gabinete Eman no a cumpli atrobe!
Pa loke ta e di tres kwartaal 2017: ‘Derhalve is het CAft van oordeel dat uit de derde uitvoeringsrapportage onvoldoende aannemelijk blijkt dat het voorlopige tekort van 2,6% in het laatste kwartaal terug gebracht zal worden tot het maximale financieringstekort van 0,5% bbp in 2017. Un biaha mas Gabinete Eman no a cumpli! Mira tabel adhunto.

Entradanan incidental den 2016
Hecho ta cu prome cu aña 2017, den e reportahenan di kwartaal 2016 Gabinete Eman supuestamente lo a cumpli cu e norma stipula pero CAFT a indica cu esaki ta debi na “incidentele meevallers die structurele tegenvallers dekken”. Pero despues di 2016 e baca di lechi no tabata duna lechi incidental mas y e gobierno di AVP no tabata tin caminda mas pa saca placa y p’asina facelift nan maneho financiero cu tabata desastroso durante 8 aña largo.
Pues por mira claramente cu sr. Sneek un biaha mas a sinta lepia como parlamentario, no a haci su esfuerzo pa lesa tur e reportahenan di kwartaal cu CAFT a traha di su gobierno y cu ta mustra claramente cu riba papel nan por a traha tur e reportahenan aki den forma manipulativo pero e realidad a demostra cu nan no tabata cumpli cu e normanan stipula pa CAFT. Y awe nos tur ta horca cu un debe insurmontabel cu nos mester bay paga cu orguyo te cu aña 2039 y esaki danki na manipulacion y locura di partido AVP.