Recientemente por a tuma nota di un articulo di AVP cu e titulo “Crisis imaginativo di Gabinete Wever Croes…”. E expresion aki ta un bofta den cara di nos Pueblo. Cu e expresion aki AVP ta tira salo riba e herida habri cu nan a ocasiona cu nan maneho descabeya y iresponsabel di ultimo 8 añanan. Danki na e dies mil ex votadornan di AVP cu a spierta di e “prosperidad imaginativo” cu AVP a bin ta bende mediante tur nan periodistanan cumpra, cu Aruba awor ta den man di Gobernantenan responsabel.
Ora cu un Partido ta capaz di referi na e crisis financiero di bo Pais cu por cierto abo mes a causa, como un crisis imaginativo, e ta indica bo cu e partido aki di berdad ta biba den la-la-land. AVP a causa hopi daño na e pais aki cu un maneho economico cu full rond mundo a fracasa. Pero Mike Eman kiermen cu na Aruba si e lo funciona. E consecuencia ta cu awe Aruba pa cada florin cu e tin, 93 cen ta pa paga debe cu Mike Eman a crea cu hopi orguyo pa abo cu mi paga.
Pero e farce di e “prosperidad imaginativo” di AVP, a afecta tur hende cu na september 2017 e pueblo aki a bisa AVP, TA BASTA!
E inhusticia ta cu ta tuma MEP un biaha mas pa sali na rescate di nos Pueblo. E diferencia ta cu MEP a asumi e reto aki sin titubia! Ta tuma MEP un biaha mas pa lucha pa un futuro sigur pa nos yiunan.
Husto ta paga pa pecador pero penado no ta pena pa largo. Tardi of trempan husticia lo vence e farce y engaño di AVP. Lo no resta AVP nada otro cu uza nan “imaginacion” pa surpasa locual cu nan a ocasiona full un pueblo.