Home Politics E palabracion cu taxistanan tabata pa ahuste di tarifa y a cumpli...

E palabracion cu taxistanan tabata pa ahuste di tarifa y a cumpli cu esey sin haci ningun cambio

 

 

Relaciona cu e declaracionnan publico haci pa sra. Linda Orman, den representacion di un grupo di taxista, Minister Chris Romero ta enfatisa cu na ningun momento a falta na e acuerdo di dia 2 di juli ultimo.

 

Durante e reunion caminda a yega nan un concensus pa cu ahuste di e tarifa di taxi, no a palabra nada otro cu no tabata e lista di prijs nobo. E dia aki a tene cuenta cu e disgusto di e taxistanan cu, den 9 aña no a conoce un ahuste di tarifa, y asina a honra nan peticion pa ahusta e prijs di servicio di taxi. A base di esaki a yega nan un acuerdo unda cu ambos partido a sali satisfecho, pero nada otro a wordo acorda na e reunion di dia 2 di juli. A keda completamente cla cu e lista di prijs di servicio di taxi y no a bin ningun cambio den esaki.

 

Tabata un sorpresa pa scucha cu sra. Orman a yama un conferencia di prensa pa declara cu Minister no lo ta cumpliendo cu e cambionan cu nan lo ta desea encuanto condicionnan di nan permiso di taxi.

Ta bon pa tene semper na cuenta cu regulacion y/of condicion pa cu permiso di taxi ta algo cu ta keda na discrecion di e Minister encarga, y e ta bay segun ley ta prescribi y ningun otro persona of instancia por dicidi riba esey.

“Ora bo ta papia di condicionnan, esakinan ta wordo apunta pa e Minister encarga y basa riba loke ley ta rekeri”, tabata palabranan di Minister Chris Romero.

 

E titular di e cartera di Transporte semper a expresa su disponibilidad pa dialogo y esey nunca no tabata un excepcion pa e taxistanan. “Semper mi tabata y loke keda habri pa sinta papia y scucha proposicion pa cambionan positivo y beneficioso, y den e caso aki mi ta mas cu dispuesto pa haci’e tambe. P’esey el a cay mi como sorpresa pa scucha sra. Orman duna declaracionnan incorecto riba supuesto cambionan cu lo mi a haci, unda cu realmente esakinan no a tuma lugar nunca”, Minister Romero a sigui bisa.

 

Semper tin espacio pa dialogo pa asina yega na solucionnan duradero cu ta na beneficio di tur partido envolvi. Semper teniendo na cuenta cu tur cos mester bay den marco di loke cu ley ta prescribi y no di otro manera.