Dr. Horacio E. Oduber Hospital a eligi nan empleado di luna juni den persona di röntgenlaborant SR. Carl Arrindell di departamento di Radiologia. Diferente colega, manager y Hunta di Directiva a yega hunto pa sorprende Carl Arrindell, kende no tabata sa cu a scoge como empleado di luna.
Carl Arrindell ta empleado di luna pa motibo cu e ta traha hopi bon, asina sra. Brenda Biezen, Zorgmanager di departamento di Radiologia, a duna di conoce. E ta percura pa duna informacion corecto na pashentnan y semper t’ey p’e team. E ta yuda unda mester y semper ta duna su 100%.
E departamento ta hopi grandi y e trahamento den team ta hopi bon. E ta masha flexibel y ta asisti e departamento unda cu e por. Carl Arrindell ta un persona hopi positivo, hopi amabel y ta open. Por acerk’e y haci cualkier pregunta unda cu mester e ta yuda. Tur esey ta yuda cu e teamwork riba e departamento, sra. Biezen a duna di conoce.
Carl Arrindell ta trahando pa 30 aña caba den Hospital y esaki ta prome biaha cu el a bira empleado di luna. El a cuminsa traha na aña 1983 como “donkere kamer kracht”, unda cu tabata laba potret y pa 9 aña largo a haci e trabou aki. Door di mira e trabou di saca potret tur dia, el a haya esaki interesante. Na aña 1992 el a bay studia na Merca pa bira röntgenlaborant pa saca potret. El a logra su meta y na 1997 Carl Arrindell a haya e oportunidad pa bin traha bek na Aruba como röntgenlaborant.
E tin amor pa su trabou y ta amabel y cordial cu su pashentnan; e ta duna bon splicacion y ta percura pa e pashent keda trankil. Ademas e ta tuma iniciativa door di percura e cambernan semper ta carga cu tur ekipo y material. E ta un persona positivo y integro, tumando responsabilidad pa su trabou. Tambe ta gradici Carl pa su empuhe y sosten duna na departamento di Radiologia.
E sorpresa tabata uno hopi grandi pa Carl Arrindell, kende no tabatin niun idea. Ora di ricibi un reconocemento bunita asina aki bo ta sinti e honor, el a duna di conoce. Carl Arrindell a bisa cu e ta purba coopera y yuda unda cu e por p’e ambiente di trabou. E ta stima su trabou y ta purba pa otronan tambe tin amor pa nan trabou.
Carl ta traha na un manera profesional, ta traha duro y ta pone e pashent na prome luga. Masha pabien cu e tremendo reconocimento aki.