Un herencia mas di e gobierno anterior, cu no a tene cuenta cu esaki ora a muda e waf pa Barcadera
Oranjestad: Algun siman pasa, Prome Minister Evelyn Wever a wordo aserca door di ATIA pa atende cu e tema di ASTEC y e huma dañino cu ta sali for di WEB. Mesora a yama un reunion cu ASTEC, A.P.A., W.E.B. y Directie Natuur en Milieu pa toca e tema aki.
Aparentemente e huma cu ta sali for di WEB ta dañino pa hende cu ta traha den cercania di esaki. E ta afecta bo wowonan, cuero y garganta. Ora cu nan a papia riba e tema aki, y e punto aki di a wordo treci dilanti, ASTEC a splica con su trahadonan ta sufri bou di e circunstancianan aki.
W.E.B. su prome reaccion ta, cu W.E.B. ta situa eynan for di hopi tempo. Ora cu e gobierno anterior a dicidi di muda e Waf nan no a haci ningun investigacion referente e calidad di aire.
A.P.A. cu a bay di acuerdo pa move e waf pa Barcadera tampoco a haci un investigacion. ASTEC cu a tuma e trabou na Waf na Barcadera tampoco a haci un investigacion di e calidad di aire y awo ta sinta cu e hecho cu e aire ta afecta e trahadornan.
W.E.B. di su banda a bisa cu e no tawatin pensa den e termino corto aki pa hasi ningun inversion pa cambia esaki, pero Gobierno y Prome Minister di Aruba a haci un peticion na W.E.B. pa buska un solucion.
Prome Minister enfaticamente a bisa; ” paso ora ta trata di bida di hende, salud di hende no tin wega, nos mester buska un solucion.”
Lamentabel di tur esaki ta cu W.E.B tin un vision y tin su plan di inversion cla, awo mester desvia di su plan, pasobra e gobierno anterior, ora di a haci e mudansa no a haci su trabou manera debe ser.
Na fin di dia ora ta trata di salud di hende, e gobierno aki ta pone esey como number un.
W.E.B. a bay den su seno y a bay busca un solucion, tin diferente solucion cu por pensa riba dje, por pone un filter riba e tubonan, por hisa e tubonan un poco mas halto pa e huma bay un poco mas leu. E tipo di inversionnan aki ta costa hopi y ta tarda pa yega asina leu.
E ora a bay busca un otro solucion, cu ta den e calidad di e crudo cu WEB ta uza pa genera coriente. Den e caso aki nan ta cumpra un crudo di atraves di FMSA di RDA cu tin sulfer na 3%, algo cu segun W.E.B. a splica no ta contra ley, pero ta locual ta afecta e trahadonan. Actualmente W.E.B. ta buscando un crudo cu ta contene menos sulfer, sea 2% of 1.5% pa asina e efectonan di e gasnan cu e ta saca no afecta e trahadonan.
Ta wordo calcula cu lo dura entre 6 pa 8 siman pa yega asina leu, ta cuestion di buska un otro compania for di cual lo por bay cumpra e crudo ey for di dje y pa kibra e contract cu tin actualmente y cuminsa ricibi e crudo aki di un otro calidad.
Lamentablemente esaki lo trece gasto cune cu WEB no a tene den consideracion, pero ora ta trata e bida y salud di hende, esey ta bay prome.
E problema aki tin e mandatario hopi preocupa y indigna paso un gobierno anterior cu a hinka tanto placa den promove Aruba como un green island cu green energy, pero ora ta trata cu salud di hende, loke ta mas principal nan a lubida. Nan a prefera di a bay hinka placa den show, den papia hopi tocante energia alternativo pero loke ta mas importante cu ta pensa riba salud di hende nan no a pone atencion na esey.
Prome Minister a sigui bisa: “ pero nos como gobierno, Mescos cu diferente otro problema cu Gobierno anterior a ocasiona, nos tin cu atende cune y nos ta atendiendo e, salud di hende na prome lugar, trahadornan di Astec na prome lugar,” y den 6 pa 8 siman e situacion aki ta coregi , algo cu pa añas no a wordo atendi cune.
Prome Minister ta pidi tur hende pa yudanan cu esaki, pa carga poco mas pasenshi, e ta compronde cu ta dificil, pero tambe pa e trucknan cu a bay ayera den accion, pa nan compronde cu esaki ta otro herencia mas di e gobierno anterior y cu e gobierno aki SI ta atendiendo cune y lo bin cu e mihor solucion cu ta na bienestar di e trahadornan di Astec y tur esnan cu ta depende di dje.