Home » Rudy Richardson di MEP: Ainda bo ta kere den AVP? E partido cu a traiciona abo y bo generacion!

Rudy Richardson di MEP: Ainda bo ta kere den AVP? E partido cu a traiciona abo y bo generacion!

by Admin
0 comment 61 views

 

 

Mas e dianan pasa nos tur por wak con e Gabinete actual di sra. mr. Evelyn Wever Croes ta hibando e pais aki den un rumbo mas progresivo unda cu den apenas 7 luna nos ta cambiando e panorama politico pa e beneficio di e digno pueblo di Aruba. Por a wak nos contrincantenan, esnan di e “instituto” AVP a intensifica nan noticia falso (fake news) pa sigui bruha tera. E unico diferencia ta cu awo no ta cu e placa di belasting mas pasobra e fiesta ey tambe a caba. Unda e ultimo 8 añanan tawata abusa di fondonan publico pa laba celebro di nos pueblo. E fraccion di AVP no tin cuero di cara mas. Nan ta hibando un oposicion totalmente basa riba mentira na nivel di “Yo no fui.”

 

Bao AVP, San Nicolas na suela

Wel, a yega ora atrobe pa mi duna San Nicolas e ‘bon noticia’ di e maneho di sr. Mike Eman y su candidato di San Nicolas sr. Mike de Meza despues cu nan a goberna Aruba desde 2009-2017 nan a laga San Nicolas na suela. No tin nada concreto cu a wordo haci na e districto pa adelanto di nos pueblo. Yuana Morto Complex no tin solar panels funcional, algun bombiyo nan a pega cu masha buya. Lago Heights Park a keda sin Wifi mescos cu tur warda di polis na Aruba. Joe Laveist Ballpark mas cera cu ta habri, Ibisa San Nicolas ignora totalmente y varios otro canchanan Deportivo Esso Heights y Village den un estado deplorabel. Hasta recien varios stadion a wordo afgekeurd na Aruba. Ta ken por cu horcan Mike di categoria 5 cu a pasa laga Aruba y su pueblo total loss cu un debe nacional di 93% debt-to-GDP ratio. Awo ta sali na cla cu sr. Eman a construi Multifuncional Accomodations (MFA’s) na Noord, Paradera, Santa Cruz y Savaneta pero a laga San Nicolas un bes mas afo. Ki tristesa cu ultimo eleccion partido AVP  tawata e votegetter den dicho districto, pero Mike Eman no a duna nan voto niun tipo di balor, pasobra e no solamente a usa e placa presupuesta pa 5 MFA via Parlamento (fraccion AVP cu mayoria) pero a gasta placa di esun di San Nicolas y riba dje a BENDE e edificio di San Nicolas (hulpbestuurskantoor) cu Stichting Onroerend Goed Aruba (SOGA). Pues un bes mas San Nicolas por wak con partido AVP ta uno di traicion pasobra esaki a wordo haci na aña 2014, un aña despues cu partido AVP a bay di 12 pa 13 asiento cu aprobacion di e pueblo votador di San Nicolas.  E trio famoso aki sr. Eman, sr. de Meza y sr. Arends e supuesto profesional cu a orchestra e deal “spirito” di Citgo cu nos tur ta warda ainda. 

 

San Nicolas den desaroyo positivo

Nos di e Gabinete Evelyn Wever Croes ta sigui traha pa saca e pueblo di Aruba dilanti cu honor y dignidad. E aña escolar di 2017-2018 no tawata mucho cos di gaba mirando cu varios di nos scolnan tawata tin exito marginal cu excepcion di Filomena MAVO cu 90% di exito den examen klas, tur otro school similar tawata tin menos graduado incluyendo HAVO. Esaki ta mustra un bes mas cuanto problema social tin na San Nicolas. Desde cu gobierno MEP\POR\RED a cuminsa goberna mi a cuminsa traha riba empleo pa San Nicolas bao Minister Glenbert F. Croes. Tambe mi ta bezig cu San Nicolas AREA, un iniciativa di nos Minister President pa activa e bida economico bek na San Nicolas cu tin mas di 80% di comercio cera. Mi a cuminsa traha cu nos Chef di Bureau sra. Terry Gumbs na oficina di gobierno Edison Briesen riba varios area pa duna San Nicolas un speransa nobo. Nos ta bezig cu e casnan bandona, e problema di adictonan ambulante, oportunidad pa sigui cursonan profesional na San Nicolas, en fin trahando riba e fabricacion humano cu mester pa cosecha exito. Tanto obstaculo mi ta encontra, tanto negligencia structural di AVP cu mi no por kere cu San Nicolas ta bay acepta esaki sin mas. Instituto Medico San Nicolas ta bezig cu un expansion cu mester a sosode desde 2009, actualmente e parkinglot a bira chikito caba. Anto ainda tin e otro proyectonan manera e boutique hotels y desaroyo pa Aruba Golf Resort. Zeewijk/Cura Cabay mester mas atencion di infrastructura. Nos ta bezig cu San Nicolas Business Association cu nan plan di Fast Ferry y mucho mas excluyendo e reapertura di nos refineria pasobra nos no por warda mas. Si e refineria bin e ta bon bini pero e mester ta uno cu ta opera respetando e salud publico di nos pais. Asina nos tur por wak e diferencia den apenas 7 luna y nos lo sigui traha y contra aresta tur e noticianan falso y sin etica politico di Mike y su grupo di Alibaba.  “E felicidad cu mi ta desea pa mi propio yiunan, ta e felicidad cu mi ta desea pa henter e pueblo di Aruba.” Betico Croes (Omar Torijos di Panama).

 

 

You may also like

Our Company

Aruba Native News & Trends. Here to bring you the latest news and trends from our happy island.

Newsletter

Subscribe my Newsletter for more news. Let's stay updated!

Laest News

Copyright @2023 – Aruba Native All Right Reserved. Powered by 139 Design Studio