Home Police Brandweer a pidi pa presencia di polis, ora a bay paga candela...

Brandweer a pidi pa presencia di polis, ora a bay paga candela na oficina di polis di bario

Seroe Patrishi: Diaranson anochi algo prome cu 10’or di anochi, brandweer ta sali pa bay paga un candela na oficina di polis di bario den e casnan di FCCA.

Pa siguridad di e personal di brandweer a pidi pa polis acompaña e truck di brandweer pa drenta den e bario aki y asina paga e candela, mirando cu ultimamente tin hopi problema cu asunto di tiramento di piedra y baranca riba autonan cu pasa den e cayanan di Seroe Patrishi.

Tres patruya di polis a bay na e sitio pa mantenen orden, mientras personal di brandweer tabata pagando e candela na e Post di polis di bario di Seroe Patrishi.

Desconocidonan a cende un candela cu papel y documentonan cu tabata tin den e lugar. Tambe otro banda di caminda na Flores supermarket nan a cende e bari di sushi na candela.

Hopi liher brandweer a paga e candelanan y nan a bay for di e sitio, e patruyanan di polis tambe a sigui cu nan patruya.

E ta un situacion hopi fastioso ultimamente pa motibo cu algun persona ta sconde y ta pasa manda auto cu baranca, causando daño na autonan cu ta pasa, ni pa autoridad nan tin respet paso te hasta riba auto di polis nan a yega di manda piedra.

Mirando cu ta temporada di vakantie, polis ta spera mas problema den e bario di Seroe Patrishi. E mandamento di piedra aki tin un par siman ta pasando, e ta algo peligroso cu por causa dañonan grandi y ta trece bida di otro sigur den peliger. Ta constantemente polis ta wordo manda den e bario aki pa personanan cu ta pasa tira piedra riba autonan cu ta pasa den e caya di Seroe patrishi.

Ban spera cu pronto e personanan cu ta haciendo esaki aki, realisa cu kiko cu nan ta haciendo ta peligroso y tambe pensa bon riba e consecuencianan y stop di haci cosnan aki cu mayan por causa dañonan grandi na otro.