Partido MEP a tuma nota cu e prijs di gasolin, diesel y kerosin a baha entrante awe diaranson 11 di juli. E prijs di gasolin a baha cu 4.9 cen, diesel a baha cu 4.3 cen y kerosin a baha cu 3.4 cen pa liter. Esaki ta un noticia positivo pa e pueblo consumidor despues cu nos a conoce un aumento di prijs di comustibel na comienso di juli 2018. E echo cu prijs di gasolin ta stipula na 214.8 cen pa liter, pues riba 2 florin pa liter, ta debi cu te ainda nos na Aruba y mundo henter ta experencia un prijs di crudo riba mercado internacional bastante halto durante e ultimo 8 lunanan.
Ultimo dianan contrincantenan politico di AVP ta critica e gobierno actual pa cu e prijs di gasolin y diesel. Sinembargo nan no ta splica pueblo cu durante henter e periodo di augustus 2015 te cu september 2017, esta bao di Gabinete Mike Eman II, e prijs di crudo WTI riba mercado internacional a baha drasticamente te bao di 50 dollar pa bari y te hasta na februari 2016 e prijs di crudo a yega te na 30 dollar pa bari (mira tabel adhunto), pero e pueblo consumidor no a gosa ni un dia di e reduccionnan drastico di prijs di crudo. No ta normal cu a yega te hasta asina leu cu na juli 2015 nos tabata paga 204.30 cen pa liter di gasolin!
Asina nos por mira kico e famoso hedging coruptivo implementa pa Gabinete Mike Eman a haci perhudicando nos pueblo di disfruta di e reduccionnan drastico di prijs di crudo riba mercado internacional. E hedging aki so a logra ranca mas di 300 miyon florin for di cartera di e pueblo consumidor pa loke ta e utilidadnan, gasolin y diesel.
Finalmente pueblo mester ta consciente si cu durante e ultimo lunanan aki e prijs di crudo pa bari a sigui aumenta y ya e siman aki a yega te na 74 dollar pa bari y pa cu esaki e gobierno di Aruba no tin ningun influencia pa contraaresta e aumento aki.
