Parlamentario Endy Croes a baha hopi pisa riba tanto e Directora di ATA esta Ronella Tjin Asjoe y Presidente di Board sra. Marieta Ras. Locual a pasa den ATA ta inaceptabel y Parlamentario Croes a haci un peticion extra oficial na e Minister encarga sr. Dangui Oduber pa tuma accion di inmediato riba esnan culpabel. No por ta posibel cu henter pueblo ta sacrificando cu un Crisis Heffing pa trata na remedia e desaster financiero cu AVP a laga atras y awor e propio hendenan di AVP cu a causa e desaster ta sigui fiesta tumando un decision incorecto faboreciendo ruman homber di Mike Eman aprobando un suma di 810.000 (810 mil) florin pa entre otro cumpra un auto di careda pa core na Merca.
Placa pa un solo famia
Desde December 2017 Endy Croes a manda pregunta pa ATA unda ATA por escrito a contesta cu Famia Eman a ricibi 1.6 MIYON for di Mike Eman via ATA pa su ruman. Endy Croes den prensa a remarca cu tanten no tin placa pa drecha Palo Marga unda mas cu 800 coredor ta sufriendo cu e deterioro cu Palo Marga ta pasando aden no por tin tampoco placa pa un solo famia, esta famia di Mike Eman. Minister Dangui Oduber a duna instruccion caba cu ta para e abuso aki na inicio di aña. Sinembargo Mike Eman su famia ta manda un otro peticion dia 24 di Juni 2018 pa Director di ATA esta Ronella y debi cu e peticion ta pa un suma asina grandi y Ronella no por firma su so sumanan riba 100 mil florin basa riba artikel 21 di Landsverordening no. 14, Ronella a manda esaki door pa Board di ATA, esta pa Presidente Marieta Ras. Marieta manera nos a splica anteriormente su yiu ta casa cu yiu di Mike De Meza y asina Mike de Meza a nombr’e como presidente di tal Board. E manera cu el a wordo nombra tambe ta lanta hopi “red flags” y ta casi imposibel con e por a haya un Landsbesluit di Gobernador e tempo aya. Awe nos lo splica esaki.
Contracto riba lomba di pueblo
Marieta Ras hunto cu su compañero di bida tin un compania di real estate cual yama AFEM CORPORATION. Obhetivo di e compania aki inscribi na Kamer van Koophandel ta netamente pa haci transaccionnan di onroerende goederen esta bende cas, edificio y construi di acuerdo cu Kamer van Koophandel. Awor pa “kisas” by pass Gobernador, Mike De Meza a percura pa un transaccion diferente y a cera contracto cu e compania AFEM cual ta cobra e suma di 180 mil florin pa aña esta Afl.15.000 florin pa luna como salario pa Marieta, presidente di Board ATA. Descripcion di e contracto cu AFEM (un compania di Real Estate) lo tin experencia amplio den sector di turismo tanto nacional y internacional. Asina a maniobra e contracto aki riba lomba di e pueblo pa complace suegra. Awor e disgusto di mas grandi ta bin. ATA sa masha masha bon cu Aruba ta den crisis unda hasta ATA mester a coopera cu dividendo pa cera presupuesto 2018. Apesar cu Aruba ta den Crisis y gobierno nobo a expresa di no tin interes pa sigui cu e contracto aki y Parlamento a splica esaki den prensa, Ronella enbes di duna un conseho negativo ta laba man manera Poncio Pilato y ta pasa e peticion aki pa Marieta Ras kende na su turno ta aproba un suma di casi 1 Miyon florin pa ruman di Mike Eman. Pues Ronella tambe a bay di acuerdo indirectamente.
Decision mester wordo revoca
Peticion a drenta 24 di Juni 2018 y ya caba a wordo aproba y firma 2 di Juli 2018. Tin hende tin suerte den bida no? Aparentemente segun informacion tanto Mike de Meza y Mike Eman a yama Marieta pidie e cooperacion aki. Esaki e Coalicion aki no por tuma sin mas y ta inaceptabel y Parlamentario Endy Croes a splica cu awe mes un carta oficial di Parlamento a sali pa Minister Dangui Oduber pa atende e caso aki di un decision descabeya den profundidad cu tur seriedad. E decision aki MESTER wordo revoca pa bienestar general. AVP no kier compronde cu awor tin un Coalicion nobo cu un maneho responsabel? AVP no kier compronde cu pueblo ta sufriendo a base di nan maneho bochornoso y e desaster financiero cu nan a laga atras? Parlamentario Endy Croes ta termina mandando mensahe pa e director y presidente di Board di ATA pa nan wake up and smell the coffee!! Fiesta a caba.