ORANJESTAD, Aruba – 9 di Juli 2018: Cu e meta pa eleva calidad di servicio y cu mira pa futuro recientemente manera ya anuncia Dr. Horacio E. Oduber Hospital a bay over riba un sistema digitalisa pa loke ta dossier medico di tur pashent. E sistema aki a bay LIVE dia 25 di juni na policlinicanan Interne geneeskunde, MDL, Oncologia y tambe Ginecologia. Durante e siguiente simannan mas policlinica di specialista lo bay LIVE y na november 2018 Hospital mes lo bay over riba e sistema digitalisa aki. Esnan cu ya a bishita un di e policlinica nan aki por a experiencia e cambio grandi aki y su impacto.
Como pashent na momento di yega un di e policlinicanan aki nan lo puntrabo bo nomber, adres number di telefon. Esaki di biaha ta bay den e sistema. Na momento cu e dokter atende’bo tur bo remedinan tambe lo wordo hinca den e sistema. Unabes bo resultadonan di test ta cla y bo plan di tratamento esaki tambe lo ser hinca den e sistema. Pues tur bo informacion lo ta digitalmente accesibel pa esnan cu ta brinda’bo cuido. Pashentnan por sinti nan mes sigur cu no tur hende tin acceso na nan informacion medico. Solamente esnan cu ta brinda’bo cuido, sea dokter of nurse por mira bo informacion.
Si e pashent tin cu bay un otro departamento, di biaha e dokter lo por “log- in” y tin acceso na e informacionnan pa por brinda cuido, asina Charlaine Huntington, manager di comunicacion di Hospital, a duna di conoce.
E dossier medico di papel no lo bay existi mas despues cu tur policlinica y Hospital bay “live”, pasobra esaki lo ser reemplasa pa e dossier medico digital. E sistema tin hopi beneficio pero un di nan sigur ta e rapidez cu un otro dunado di cuido por tin na bo historia medico. Por ehempel si un dia algo pasa y bo persona ta yega Departamento di Emergencia y bo mester ayudo medico den forma rapido, e dokter ey no tin conocemento di bo historia medico, pero e bentaha cu e tin e momento ey ta cu e ta hinca e pashent su nomber of number di AZV y di biaha e dokter ta haya tur informacion. Asina aki por yuda’bo mas lihe en caso si bo ta uzando cualkier remedi of bo ta alergico pa un remedi, asina percurando e siguridad di e pashent y cu tur cos ta bay bon.
Charlaine Huntington a pone enfasis riba e punto cu no ta tur hende tin acceso na e informacionnan di e pashent. “Si ami no ta brindabo cuido, ami no tin acceso na bo informacion”, asina el a duna di conoce. E sistema ta accesibel pero na mes momento hopi sigur.