Diaberna 6 di juli Minister di Educacion, Ciencia y Desaroyo Sostenibel a firma un acuerdo di cooperacion cu e presidente di Stichting Avondonderwijs Aruba (SAA), sr. Frans van Drie. E acuerdo ta ensera cu autoridad competente (‘bevoegd gezag’) di middag y avond Mavo lo bira SAA for di 1 di augustus 2018. Cu esaki ta bira realidad un anhelo di hopi decada, esta cu Mavo y Havo ta uni forsa y ta facilita e posibilidad pa alumnonan pasa di Mavo pa Havo den e asina yama ‘tweedekans onderwijs’.
E integracion aki lo beneficia tur dos banda y lo fortifica e calidad di educacion. E ta un cambio administrativo unda tur docente lo keda duna les y no mester tin preocupacion pa loke ta su funcion. E directora actual di Openbare Avondleergangen Aruba (OAA) lo keda directora di OAA y no a keda retira manera noticia falso a indica, solamente cu bao di OAA ta atende e cursonan di ofishi y no mas e middag y avond Mavo. Pa e transicion aki bay sin problema SAA a nombra dos persona pa un aña pa guia e proceso aki cu nan conseho, esta sr. Chando Pietersz y sr. Ruben Werleman, ambos cu amplio experiencia den guia di scol Mavo y di Havo. SAA ta den proceso tambe pa nombra un directora di middag- y avond Mavo cu lo asumi su funccion 1 di augustus 2018.
Tur studiante cu ta interesa den sigui middag y avond Mavo por inscribi manera ta costumber. Djis yena e formulario di inscripcion y aplica pa bira alumno di e oferta educativo aki. E inscripcion ta habri te cu 18 di juli. E cambio aki lo no perhudica ningun studiante ni ningun docente, al contrario ta beneficio so e lo trece pa tur. E empleadonan ta den servicio di OAA, afdeling middag y avond Mavo, lo mantene nan posicion huridico y sea lo bay ‘ter beschikking’ di e fundacion SAA of lo por haya un otro funcion den aparato gubernamental. Aki nos ta papia di 7 empleado
Nos ta gradici tur cu a contribui pa esaki por a bira realidad.